މާގިނައިން ކާޑް ދެއްކުމާއި ގޯސްނިންމުންތައް މާގިނައިން ނިންމާތީ ގިނަ ފާޑު ކިޔުންތަކެއް އަމާޒުވެފައިވާ ސްޕެއިނުގެ ރެފްރީ އެންޓޯނިއޯ މެޓިއޫ ލަހޯޒް މިސީޒަން ނިމުމުން ރެފްރީކަން ކުރުން ހުއްޓާލަން ނިންމާފައިވާ ކަމަށް ސްޕެއިނުގެ ނޫސްވެރިއެއް ކަމަށް ގޭސްޓަން އިޑުލް ބުނެފިއެވެ.
ސީޒަން ނިމުމާއެކު ރެފްރީކަން ކުރުމުން ލަހޯޒް ރިޓަޔަރ ކުރާނެ ކަމަށް ގޭސްޓަން ބުނެފައިވާއިރު މިހަފްތާގައި ސްޕެނިޝް ކޮޕާ ޑެލްރޭގައި ސެވިއްޔާ އާއި ލިނަރެސް ބައްދަލު ކުރި މެޗުގައި ގިނަ ގޯސްތަކެއް ލަހޯޒް ހަދާފައިވާތީ ކުރިއަށް އޮތް ހަފްތާގައި އޭނާއަށް ރެފްރީކަން ކުރަން އެއްވެސް މެޗެއް ނުދޭން ސްޕެނިޝް ފުޓްބޯޅަ ފެޑެރޭޝަނުން ވަނީ ނިންމާފައެވެ.
ލަހޯޒް، މެޗުތަކުގައި އާދަޔާ ހިލާފަށް ގިނަ ކާޑް ދައްކާ ކަމާއި ގޯސް ގިނަ ނިންމުންތައް ނިންމާކަން ގިނަބައެއްގެ ލޮލުގައި އަޅައިގަތީ މިދިޔަ މަހު ގަތަރުގައި ބޭއްވި ވަރލްޑް ކަޕް ކުއާޓާފައިނަލުގައި އާޖެންޓީނާ އާއި ނެދަލޭންޑްސް ބައްދަލު ކުރި މެޗުގައެވެ. ޕެނަލްޓީ ޖަހައިގެން އާޖެންޓީނާ މޮޅުވި އެމެޗުގައި ލަހޯޒް ވަނީ 17 ރީނދޫ ކާޑާއި 1 ރަތްކާޑް ދައްކާފައެވެ. މިއާއެކު މިމެޗް ވެގެންދިޔައީ ވަރލްޑް ކަޕުގެ ތާރިހުގައި އެންމެ ގިނައިން ކާޑް ދެއްކި މެޗަށެވެ.
މެޗަށްފަހު އާޖެންޓީނާގެ ކެޕްޓަން ލިއޮނަލް މެސީ އާއި ނެދަލޭންޑްސްގެ ބައެއް ކުޅުންތެރިންގެ ފާޑުކިޔުންތައް ލަހޯޒަށް އަމާޒުވުމުން މުބާރާތުގެ އިތުރު މެޗަކަށް އިންސާފު ކުރަން ފުރުސަތު ނުދީ ފީފާއިން އޭނާ ސްޕެއިނަށް ފޮނުވާލީއެވެ.
ލަހޯޒްގެ ކާޑް ދެއްކުމުގެ ސިލްސިލާއަށް ބޮޅެއް އިތުރުވީ ސްޕެނިޝް ލަލީގާގައި މިހަފްތާގައި ބާސެލޯނާ އާއި އެސްޕަނިޔޯލް ބައްދަލު ކުރި މެޗުގައެވެ. މިމެޗުގައި ލަހޯޒް ވަނީ 11 ރީނދޫ ކާޑާއި 2 ރަތްކާޑް ދައްކާފައެވެ.
ލަހޯޒްގެ ކެރިޔަރުގައި ބޮޑަށް އޭނާ ފާހަގަ ކުރެވެނީ ރެއާލްގެ މިހާރުގެ ރައީސް ފްލޮރެންޓީނޯ ޕެރޭޒާ ގާތް މީހެއްގެ ގޮތުގައެވެ. ލަހޯޒްވެސް އެކިއެކި ބަސްދީގަތުންތަކުގައި ރެއާލްއަށް ސަޕޯޓް ކުރާ ވާހަކަވެސް ވަނީ ބުނެފައެވެ.
ލަހޯޒް ވަނީ އޭނާގެ ރެފްރީ ކެރިޔަރުގައި މެސީ، ނޭމާ، ސްއަރޭޒް އަދި ލެވަންޑޮސްކީއަށް ރަތްކާޑް ދައްކާފައެވެ.
