އިނގިރޭސި އެފްއޭ ކަޕް ކަޕުގައި 3-1 އިން އެވަޓަން ބަލިކޮށް މަޝްހޫރު މެންޗެސްޓަރ ޔުނައިޓެޑް މުބާރާތުގެ ހަތަރު ވަނަ ބުރަށް ރޭ ދަތުރު ކޮށްފިއެވެ.
މެންޗެސްޓަރ ޔުނައިޓެޑުގެ އޯލްޑް ޓްރެފޯޑުގައި ކުޅުނު މިމެޗުގައި އެޓީމުން ލީޑް ނެގީ މިވަގުތު ރަނގަޅު ފޯމެއްގައި ހުރި ފޯވާޑް މާކަސް ރަޝްފޯޑް މެޗުގެ ހަތަރުވަނަ މިނެޓުގައި ތަނަވަސްކޮށްދިން ފުރުސަތަކުން ބްރެޒިލްގެ ވިންގަރ އެންޓޮނީ ކާމިޔާބު ކުރި ލަނޑަކުންނެވެ. އޭގެ ދިހަ މިނެޓްފަހުން ކޯނޯ ކޯޑީގެ ލަނޑުން އެވަޓަނުން އެއްވަރު ކުރިއެވެ. ކޯޑީއަށް މިލަނޑު ޖަހަން ފުރުސަތު ލިބުނީ ޔުނައިޓެޑުގެ ކީޕަރު ޑޭވިޑް ޑެހެއާއަށް ރަނގަޅަށް ބޯޅަ ކޮންޓްރޯލް ކޮށްނުލެވުމުންނެވެ.
ފުރަތަމަ ހާފް ނިމުނީ ދެޓީމު 1-1 އިން އެއްވަރު ވެގެންނެވެ.
ދެވަނަ ހާފް ފަށައިގެން މާގިނައިރުތަކެއް ނުވެ ޔުނައިޓެޑަށް ދެވަނަ ފަހަރަށް ލީޑް ލިބުނީ ކޯޑީ އަތުން ބައިކޮޅަށް ވަން ލަނޑުންނެވެ. ރަޝްފޯޑް އެވަޓަންގެ އޭރިޔާގެ ތެރެއަށް ވަދެ ގޯލު ކުރިމައްޗަށް ހުރަސް ކުރި ބޯޅަ ކޯޑީ ދިފާއު ކުރުން އުޅުމުގެ ތެރޭގައި ގޯލަށް ވަނީއެވެ.
އެވަޓަނުން ނަތީޖާ ހަމަހަމަ ކުރުމަށް މަސައްކަތް ކުރަމުން ދަނިކޮށް އެޓީމުން އުފެއްދި ކައުންޓަ އެޓޭކެއްގައި މެޗުގެ 71 ވަނަ މިނެޓުގައި ފޯވާޑް ކަލްވާޓް ލެވިން ލަނޑެއްވެސް ޖެހިއެވެ. އެކަމަކު ވީއޭއާރު ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. ޔުނައިޓެޑަށް ހިތްހަމަ ޖެހުން ލިބުނީ މެޗުގެ އިތުރު ވަގުތުގައި އާޖެންޓީނާގެ އުއްމީދީ ވިންގަރ ގާނާޗޯ ހޯދައިދިން ޕެނަލްޓީއަކުން ރަޝްފޯޑް ތިންވަނަ ލަނޑު ޖެހުމުންނެވެ.
އެފްއޭ ކަޕުގައި މިރެޔާއި މާދަމާ ރޭވެސް މެޗުތައް ކުޅޭނެއެވެ. މިރޭ ކުޅުމަށް ހަމަޖެހިފައިވާ މެޗުތަކުގެ ތެރެއިން އެންމެ ބޮޑަށް ފާހަގަ ކޮށްލެވެނީ ޓޮޓެންހަމް އާއި ޕޯޓްސްމޯތް މިއަދު ހަވީރު 5:30 ގައި ބައްދަލު ކުރާ މެޗާއި މިރޭ ދަންވަރު 1:00 ގައި ލިވަޕޫލާއި ވުލްވޮސް ބައްދަލު ކުރާ މެޗެވެ. މާދަމާ ރޭ ކުޅުމަށް ހަމަޖެހިފައިވާ މެޗުތަކުގެ ތެރެއިން އެންމެ ފާހަގަ ކޮށްލެވެނީ 9:30 ގައި މެންޗެސްޓަރ ސިޓީ އާއި ޗެލްސީ ބައްދަލު ކުރާ މެޗެވެ.
