ކްރޭޝިޔާގެ ތަޖުރިބާކާރު ވިންގަރ މިސްލާވް އޯސިޗް، އޭނާ ކުޅެމުން އަންނަ ޑައިނަމޯ ޒެގްރެބް ދޫކޮށް އިނގިރޭސި ޕްރިމިއަރ ލީގުގެ ސައުތެމްޓަނަށް ސޮއި ކޮށްފިއެވެ.
އޯސިޗް، ސައުތެމްޓަނަށް ސޮއި ކުރީ 8 މިލިޔަން ޕައުންޑުގެ ޓްރާންސްފާ ފީއެއްގައި 2 އަހަރާއި ބައިގެ ކޮންޓްރެކްޓަކަށެވެ.
އޯސިޗް ވަނީ މިދިޔަ މަހު ގަތަރުގައި ނިމުނު ފީފާ ވަރލްޑް ކަޕުގެ ތިންވަނަ ހޯދި ކްރޮއޭޝިޔާ ގައުމީ ޓީމުގައި މުހިއްމު ދައުރެއް އަދާކޮށްފައެވެ. ތިންވަނަ ހޮވި މެޗުގައި މޮރޮކޯ އަތުން ކްރޮއޭޝިޔާ މޮޅުވި ލަނޑުވެސް ޖެހީ އޯސިޗެވެ.
ސައުތެމްޓަންގެ ކޯޗް ނަތަން ޖޯންސް ބުނީ އޯސިޗް އެކްލަބާ ގުޅުމަކީ ރެލިގޭޝަނުން ސަލާމަތްވެ ކްލަބު އާމިސްރާބަކަށް ގެންގޮސްދޭނެ ސަބަބަކަށްވާނެ ކަމަށް އުއްމީދު ކުރާ ކަމަށެވެ.
"އޯސިޗަކީ އިދިކޮޅަށް ކޮންމެ ޓީމެއް ނިކުތަސް ގޯލު ފޫއަޅުވާލެވޭނެ ފެންވަރު ހުރި ކުޅުންތެރިއެއް. އޭނާއާއެކު އަހަރެމެންނަށް ގިނަ ކުރިއެރުންތަކެއް އަންނާނެ ކަމަށް އުއްމީދު ކުރަނީ. އޯސިޗް މިފަހުން ހޯދި ކުރިއެރުންތައް ވަރަށް ކައިރިން އަހަރެން ބެލިން. ވަރލްޑް ކަޕުގައިވެސް އޭނާ އެވަނީ ފެންވަރު ސާބިތު ކޮށްދީފައި" ޖޯންސް ބުންޏެވެ.
އިނގިރޭސި ޕްރިމިއަރ ލީގުގައި ސައުތެމްޓަން މިވަގުތު އޮތީ މިހާތަނަށް ކުޅުނު 18 މެޗުން ލިބުނު 12 ޕޮއިންޓާއެކު ތާވަލުގެ ފުލުގައެވެ. މި 18 މެޗުގެ ތެރެއިން ސައުތެމްޓަނަށް މޮޅު ވެވުނީ އެންމެ 3 މެޗުންކަން ފާހަގަ ކޮށްލެވެއެވެ.
