ހަނިމާދޫ އިންޓަރނޭޝަނަލް އެއާޕޯޓުން އަހަރަކު 1.2 ފަތުރުވެރިންނަށް ޚިދުމަތްދެވޭނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
އޭގެ އިތުރުން އެތަނުގައި ޒަމާނީ ރީތި ފަސިންޖަރ ޓަރމިނަލެއް ވެސް ތަރައްގީކުރެވިގެންދާނޭ ކަމަށް ރައީސް ވިދާޅުވިއެވެ. އެތަނުގައި އަޅާ އައު ރަންވޭއަކީ 2.46 ކިލޯ މީޓަރުގެ ރަންވޭއެއް ކަމަށާއި ދުނިޔޭގެ ބައްރުތަކުން ގިނަ ފަސިންޖަރުން އުފުލޭނެ ބޮޑެތި މަތިންދާބޯޓުފަހަރަށް އެތަނުގައި ޖެއްސޭނޭ ކަމަށް ވެސް ރައީސް ވިދާޅުވިއެވެ. އޭގެއިތުރުން ބައިނަލްއަގްވާމީ އެއަރޕޯޓަކަށް ބޭނުންވާނެ ހުރިހާ ވަސީލަތްތައް ވެސް ހަނިމާދޫގައި ގާއިމްކުރެވޭނޭ ކަމަށް ރައީސް ވިދާޅުވިއެވެ.
ހަނިމާދޫ އިންޓަރނޭޝަނަލް އެއަރޕޯޓަކީ 136.6 މިލިއަން ޑޮލަރުގެ ބޮޑު މަޝްރޫއެކެވެ. އެކަމަށް ބޭނުންވާ ފައިސާ ވެސް މިހާރުވަނީ ހަމަޖެހި ނިމިފައި ކަމަށް ރައީސް ވިދާޅުވިއެވެ.
"މި އެއަރޕޯޓް ވެގެންދާނީ ބޮޑުތިލަދުންމައްޗާއި، މި އުތުރުގެ ރައްޔިތުން ފަޚްރުވެރިވާނެފަދަ ޒަމާނީ އެއަރޕޯޓަކަށް. މި އެއަރޕޯޓް ނިމުމާއެކު، ސީދާގޮތުންނާއި ނުސީދާގޮތުން މި ސަރަހައްދުގެ އިގްތިސާދު ފެނުން ތޮޅިލައި އުދަވާން ފަށާނެ. އެތައް ހާސް ވަޒީފާއެއް އުފެދިގެންދާނެ. ގެސްޓްހައުސްތަކާއި، ސިޓީ ހޮޓާތަކާއި، ރިޒޯޓުތަކުގެ އެނދުތައް ބޮޑުތިލަދުންމަތީގައި އެތައް ގުނައެއް އިތުރުވެގެންދާނެ. އެކި ބާވަތްތަކުގެ ވިޔަފާރިތަކާއި، އިގްތިސާދީ މަސައްކަތްތަކަށް ގިނަ ފުރުސަތުތަކެއް ހުޅުވިގެންދާނެ. އިގްތިސާދީ ވަރުގަދަ ހަބަކަށް ބޮޑުތިލަދުންމަތި ހެދުމަށް މަގުފަހިވެގެންދާނެ،" ރައީސް ވިދާޅުވިއެވެ.
އެމަނިކުފާނު ވިދާޅުވީ ބައިނަލްއަގުވާމީ އެއަރޕޯޓަކީ ތަރައްގީގެ ރަސްމަގަށް ހުޅުވޭ މައި ދޮރާށިކަން ދިވެހީންނަށް ވަނީ ސާބިތުވެފައި ކަމަށެވެ. އޭގެ މިސާލެއް ކަމަށް ރައީސް ދެއްކެވީ ވެލާނާ އިންޓަރނޭޝަނަލް އެއަރޕޯޓެކެވެ. އެ އެއަރޕޯޓް ނެތްއިރުވެސް ހުޅުލެއަކީ ހަނިމާދޫހެން އޮތް ހަނި ދިގު ރަށެއް ކަމަށްވެސް ރައީސް ވިދާޅުވިއެވެ. "މާލެ ސަރަހައްދަށް ބާރު ސްޕީޑްގައި އައި ކުރިއެރުމުގެ އެންމެ ފުނުގައި ވިންދުޖަހާ އޮތް ސަބަބާއި ސިއްރަކީ ހުޅުލޭގައި ދަމާލި އިންޓަރނޭޝަނަލް އެއަރޕޯޓު،" ރައީސް ވިދާޅުވިއެވެ.
އެ އެއަރޕޯޓުގެ ސަބަބުން މާލޭގެ ވިޔަފާރިތައް ފުޅާވެ، މަސްމާރުކޭޓުން ފެށި މަހުގެ ވިޔަފާރި، ދުނިޔޭގެ ކަންކޮޅުތަކަށް ވާސިލްވާން ފެށި ކަމަށް ވެސް ރައީސް ވިދާޅުވިއެވެ. އޭގެ އިތުރުން ދުނިޔޭގެ ބައްރުތަކަށް، ރާއްޖޭގެ ރަށްތަކާއި މީހުން އެ އެއަރޕޯޓުގެ ސަބަބުން ގުޅުވާލައިދިން ކަމަށް ވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ މާލެ ސަރަހައްދުގެ ކަނޑުދަތުރުފަތުރު ހައިސްޕީޑަށް ބަދަލުވީ ހުޅުލޭ އެއަރޕޯޓް ނިމުމަށްފަހު ކަމަށެވެ. އެ ޚިދުމަތް އޭރު ފެށުނީ ހަމައެކަނި ފަތުރުވެރިންނަށް ކަމަށް ވެސް ރައީސް ވިދާޅުވިއެވެ. އެހެންނަމަވެސް ދިވެހި ރައްޔިތުންނަށްޓަކައި އަގުހެޔޮ އަރާމު، ހައިސްޕީޑް ފެރީ ނިޒާމަކުން މިހާރުވަނީ ބޮޑު އުތުރުގެ 41 ރަށް ގުޅާލެވިފައި ކަމަށް ވެސް ރައީސް ވިދާޅުވިއެވެ.
ރައީސް ވިދާޅުވީ ސަރުކާރުގެ އާރު.ޓީ.އެލް. ޚިދުމަތް ދިނުމުގެ މަސައްކަތް މިހާރު ވަނީ ނިމިފައި ކަމަށެވެ. ސަރުކާރު މިހާރުދާ މަގުން ކުރިއަށް ދާކަމަށްވާނަމަ މަގުމަތި ނުވާނޭ ކަމުގެ ޔަގީންކަން ރައްޔިތުންނަށް ދެއްވާ ކަމަށްވެސް ވިދާޅުވިއެވެ.
