ރާއްޖޭ ޓްރާންސްޕޯޓް ލިންކް (އާރް.ޓީ.އެލް) އިލެކްޓްރިކް ބަހުގެ ޚިދުމަތް ވިލިމާލެއަށް މިއަދު ތައާރަފް ކޮށްފިއެވެ.
މި ޚިދުމަތުގައި ބޭނުންކުރާނީ ތިމާވަށްޓާ ރައްޓެހި 6 ބަހެެވެ. އެއީ ކަރަންޓުން ޗާޖުކުރާ ބަހެވެ. ޗާޖުކޮށްގެން ދެތިން ދުވަހު ބަސް ދުއްވޭނެއެވެ. މި ބަސްތަކުގައި 11 މީހުންނަށް އިށީނދެ ތިބެވޭނެހެން ސީޓު ހަރުކުރެވިފައި ހުންނާނެއެވެ. މީގެ އިތުރުން 4 މީހުންނަށް ކޮޅަށްތިބެވޭނެ ޖާގައާއެކު ޖުމްލަ 15 މީހުންނަށް އެއްފަހަރާ ބަހުގައި ދަތުރުކުރެވޭނެއެވެ.
މި ޚިދުމަތުގެ ރޫޓާއި ޝެޑިއުލް އެކުލަވާލާފައިވަނީ ޢާއްމު ރައްޔިތުންގެ ދަތުރުފަތުރުގެ ބޭނުންތަކަށް ވިސްނައި، މި ޚިދުމަތް ބޭނުންކުރުމުގައި ރައްޔިތުންނަށް ވީހާވެސް ލުއިފަސޭހަވާނެ ގޮތްތަކަށް ރިޢާޔަތް ކުރުމަށްފަހު ކަމަށް އެމްޓީސީސީން ބުނެފައިވެއެވެ. ރޫޓައި ޝެޑިއުލް އެކުލަވާލިއިރު، ސްކޫލްތަކާއި، ބީޗު ސަރަޙައްދާއި ، އޮފީސްތަކާއި، ސިނާޢީ ސަރަޙައްދާއި، ހަސްފަތާލާއި، ފެރީ ޓާރމިނަލްއަށް ފަސޭހައިން ދަތުރުކުރެވޭނެ ގޮތްތަކަށް ވާނީ ބަލާފައި ކަމަށް ވެސް ބުނެފައިވެއެވެ.
ވިލިމާލޭގެ ކޮންމެ ހިސާބެއްގައި ދިރިއުޅުނުކަމުގައި ވީނަމަވެސް، ކޮންމެ ރައްޔިތަކަށްވެސް ފަސޭހައިން ޚިދުމަތް ފޯރުކޮށްދިނުމުގެ މަޤްޞަދުގައި، ވިލިމާލޭގެ 52.1 ކިލޯމީޓަރު ދިގު އިންޓަރނަލް ރޫޓްގެ 10 ސަރަހައްދަކަށް ބަސް ހުއްޓުމަށް ވަނީ ހަމަޖެހިފައެވެ. އާރް.ޓީ.އެލް. ވިލިމާލޭ ބަހުގެ ޚިދުމަތް ހަފްތާއަކު 7 ދުވަހު ހެނދުނު 5:35 އިން ރޭގަނޑު 00:00 އަށް ކަސްޓަމަރުންނަށް ފޯރުކޮށްދެވޭނެއެވެ. ބަހުގެ ޚިދުމަތް ކޮންމެ ބަސް ހުއްޓިއަކަށް 5 މިނިޓާއި 10 މިނިޓާއި ދޭތެރޭ ވަގުތުކޮޅެއްގައި ލިބިގެންދާނޭ ކަމަށް ވެސް އެމްޓީސީސީން ބުނެފައިވެއެވެ.
މިއަދުން ފެށިގެން ފުރަތަމަ 2 ހަފްތާގައި މުޅިން ހިލޭ ބަހުގައި ދަތުރުކުރެވޭނެއެވެ. އާރް.ޓީ.އެލް ވިލިމާލޭ ބަހުގެ ޚިދުމަތުގެ އަޖުމަ ބައްލަވާލެއްވުމަށްވެސް އެމްޓީސީީސީން ވަނީ އާންމުންނަށް ދަޢުވަތު އަރުވާފައެވެ. އަޖުމަ ބެލުމަށް ހަމަޖެހިފައިވާ ޓްރައިއަލް މުއްދަތުގެ ތެރޭގައި ކަސްޓަމަރުންގެ ފަރާތުން ލިބޭ މަޢުލޫމާތަށް ބެލުމަށްފަހު، ރޫޓްތަކަށް ބަދަލެއް ގެންނަންޖެހޭކަމަށް ފެންނަނަމަ، އެ ބަދަލުތަކެއް ގެނައުމުގެ ފުރުޞަތު އޮންނާނޭ ކަމަށް ވެސް އެމްޓީސީސީން ބުނެފައިވެއެވެ.
ވިލިމާލޭގައި އާރް.ޓީ.އެލް. ބަހުގެ ޚިދުމަތް ހިލޭ ފޯރުކޮށްދެވޭ މުއްދަތު ނިމުމުން، މާސްޓަރކާޑް/ވިސާކާޑް ބޭނުންކުރައްވައިގެންނާއި، ކިއު.އާރް. ޓިކެޓިންގެ ޒަރީޢާއިން އަދި ފައިސާ ދައްކަވާފައި ޓިކެޓް ބައްލަވައިގަނެގެން، ދަތުރުކުރުމުގެ އިންތިޒާމް ހަމަޖެހިފައިވެއެވެ. ޓްރައިއަލް މުއްދަތު ނިމުމުގެ ކުރިން ވިލިމާލެ އީ.ވީ ބަހުގެ ޚިދުމަތަށް ކަނޑައެޅިފައިވާ އަގު ހާމަކުރާނޭ ކަމަށްވެސް އެމްޓީސީސީން ބުންނެވެ. ޓްރައިއަލް މުއްދަތަށްފަހު، ޓިކެޓް ނަގައިގެން ދަތުރުކުރަން ފެށުނަސް، 65 އަހަރުން މަތީގެ މީހުންނަށާއި، 3 އަހަރުން ދަށުގެ ކުޑަކުދިންނަށް ދިވެހި ރައްޔިތެއްކަން އަންގައިދޭ ކާޑު، އަދި ޚާއްސަ އެހީއަށް ބޭނުންވާ ފަރާތްތަކުން، ނޭޝަނަލް ސޯޝަލް ޕްރޮޓެކްޝަން އެޖެންސީ )އެންސްޕާ( އިން ދޫކޮށްފައިވާ ކާޑު ދެއްކުމުން ހިލޭ ދަތުރުކުރުމުގެ އިންތިޒާމް ވަނީ ހަމަޖެހިފައެވެ. މީގެ އިތުރުން، ޔުނިފޯރމްގައި ތިބޭ ސްކޫލް ކުދިންނަށްވެސް ބަހުގައި ހިލޭ ދަތުރުކުރުމުގެ އިންތިޒާމް ވަނީ ހަމަޖެހިފައެވެ.
"އާރް.ޓީ.އެލް. ވިލިމާލޭ ބަހުގެ ރޫޓް މެޕްއާއި ޝެޑިއުލް، އާރް.ޓީ.އެލް. ވެބްސައިޓް އަދި އެޕް މެދުވެރިކޮށް ކަސްޓަމަރުންނަށް ބަލައިލެވެން ހުންނާނެއެވެ. ރާއްޖޭގައި ދަތުރުފަތުރުގެ ޙިދުމަތް ފޯރުކޮށްދޭ އެންމެ ބޮޑު ކުންފުނީގެ ހައިސިއްޔަތުން، އަޅުގަނޑުމެންގެ މަޤްސަދަކީ އެކަށީގެންވާ އަގެއްގައި ލުއި ފަސޭހަކަމާއިއެކު ބޭނުންކުރެވޭ، ކަނޑާއި އެއްގަމުގެ ދަތުރުފަތުރުގެ ޚިދުމަތެއް ރައްޔިތުންނަށް ފޯރުކޮށްދޭ ކުންފުންޏެއްގެ ގޮތުގައި ދެމިތިބުމެވެ."
