ލ. ހިތަދޫ އާއި ކުނަހަންދޫ ކޯޒްވޭ އަކުން ގުޅާލުމުގެ މަޝްރޫޢު ސަރުކާރުން މިއަދު އެމްޓީސީސީއާއި ހަވާލުކޮށްފިކަމަށް އެކުންފުނިން ވިދާޅުވެއްޖެއެވެ.
އެމްޓީސީސީއިން ވިދާޅުވި ގޮތުގައި މިމަޝްރޫޢު ހަވާލުކުރުމަށް މިއަދު ބޭއްވި ރަސްމިއްޔާތުގައި، އެކުންފުނީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ އަލްފާޟިލް އާދަމް އާޒިމްއެެވެ އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ، ޑިރެކްޓަރ ޖެނެރަލް، އަލްފާޟިލާ ފާތުމަތު ޝާނާ ފާރޫޤެވެ.
އެކުންފުނިން ވިދާޅުވީ އެ ދެ ރަށަކީ ޒަމާނުއްސުރެވެސް އެކުވެރި ގުޅުން ބަދަހި ދެ ރަށެއްކަމަށެވެ. އަދި މީގެ 20 އަހަރު ކުރިން ހިތަދޫ އަށް ކުނަހަންދޫގެ ރައްޔިތުން ބަދަލުވެ، އަލުން އަނބުރާ ކުނަހަންދޫ އަށް ދިޔުމާއި ހަމައަށް، އޭރުގައި އުފެދިފައިވާ އާއިލީ ގުޅުންތައް މިއަދާ ހަމައަށްވެސް ދެ ރަށުގައި ލާމެހިފައިވާ ކަމަށެވެ.
މި ދެ ރަށުގެ އާބާދީ އެއްކޮށްލުމުން 2209 މީހުންގެ ހެޔޮވަރުގެއާބާދީއެއް ހަމަވެއެވެ. ހިތަދޫގައި ކަނޑުމަހުގެ މަސްވެރިކަން ރަނގަޅަށް ކުރާ ހަތް އޮޑިފަހަރު އޮންނައިރު ރަނގަޅު ފެންވަރަކަށް ދަނޑުވެރިކަންކުރާ ފަރާތްތައް ކުނަހަންދޫގައި ދިރިއުޅެއެވެ. އަދި މި ދެރަށުގެ ރައްޔިތުންނަކީ އެކި ބޭނުންތަކަށް އެރަށުން އަނެއްރަށަށް ކޮންމެ ދުވަހަކުހެން ދަތުރުކޮށްހަދާ ރައްޔިތުންތަކެކެވެ. އަދި ކުނަހަންދޫ ރައްޔިތުން ހިތަދޫ މަސްދޯނިފަހަރު މަހަށް ގޮސްއުޅޭއިރު، ހިތަދޫ ރައްޔިތުން ދަނޑުވެރިކަމުގެ އެކި ބޭނުންތަކަށް ކުނަހަންދޫއަށް އައިސް އުޅެއެވެ.
އެހެންކަމުން، އެމްޓީސީސީއިން ވިދާޅުވީ މި ދެ ރަށް ކޯޒްވޭއަކުން ގުޅުވުމަކީ، އޭގެ ސަބަބުން، މި ދެ ރަށުގެ ރައްޔިތުންނަށް، ވަރަށް ބޮޑު ލުއިފަސޭހަތަކެއް ދަތުރުފަތުރާއި، އިޤްތިޞާދީގޮތުންނާއި އަދި އިޖްތިމާޢީ ގޮތުންވެސް ހޯދައިދޭނެ ކަމެއްގެ ގޮތުގައި މި ކުންފުނިން ޤަބޫލުކުރައްވާކަމަށެވެ. އަދި މި ކޯޒްވޭއިން ގުޅާލެވެނީ ޖުމްލަ ތިން ރަށްކަމަށާއި އެއީ، ހިތަދޫ އާއި ކުނަހަންދޫ ދޭތެރޭގައި އޮތް "މެންދޫ " ކިޔާ ފަޅުރަށް ކަމަށް އެކުންފުނިން ވަނީ ވިދާޅުވެފައެވެ.
މި ދެންނެވި ރަށަކީ، މުސްތަޤުބަލުގައި މި ދެރަށުގެ ރައްޔިތުންނަށްވެސް އިޤްތިޞާދީ މަސައްކަތްތަކެއް ކުރުމުގެފުރުޞަތު އޮތް ރަށަކަށް ވީތީ، މި ކޯޒްވޭ ވެގެންދާނީ، ހިތަދޫއަށްވެސް އަދި ކުނަހަންދޫއަށްވެސް، މި ގޮތުން ދިރުން ގެނުވާނެ ކޯޒްވޭއަކަށް ކަމަށްވެސް އެފަރާތުން ވަނީ ވިދާޅުވެފައެވެ.
މި މަޝްރޫޢުގެ ދަށުން:
- 22408 ކިއުބިކް މީޓަރުގެ ސަރަޙައްދެއްގެ ބިން ހިއްކުން
- 20040 އަކަ މީޓަރުގެ ސަރަޙައްދެއްގެސާފުކުރުން
- 390 މީޓަރުގެ ސަރަޙައްދެއްގައި ރިވެޓްމެންޓް ޖެހުން
- 130 މީޓަރުގެ ސްކައުރިންގ އ ޕްރަންއެއް ހެދުން
- 225 މީޓަރުގެ ބްރިޖެއް ހެދުން
- 85 މީޓަރުގެ ރީޓެއިނިންގ ފާރެއް ހެދުން
- 3006 އަކަ މީޓަރުގެ ދުއްވާ ސަރަޙައްދެއްޤާއިމުކުރުމާއި، މަގުބައްތި ހަރުކުރުމުގެ މަސައްކަތް ހިމެނެއެވެ.
މި މަޝްރޫޢަކީ 20.75 މިލިއަން ރުފިޔާއަށް 500 ދުވަސްތެރޭގައި ނިންމުމަށް ހަވާލުކުރެވިފައިވާ މަޝްރޫޢެކެވެ.
