މިއަހަރު ސެޕްޓެމްބަރ 9 ގައި ބާއްވާ ރިޔާސީއިންތިޚާބު ކާމިޔާބު ކުރުމަށް ބޭނުންވާ ވޯޓާއި ތާއީދު ލިބިވަޑައިގަންނަވާނޭ ކަމުގެ ޔަގީންކަން ޝައްކެއްނެތް މިންވަރަށއ އެބައޮތް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު މިއަދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިއަދު ކ. ގުރައިދުއަށް ވަޑައިގެން އެރަށު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. އެމަނިކުފާނުގެ މިދަތުރުފުޅަކީ އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ކުރައްވާ ދަތުރުފުޅެކެވެ.
"މި ޕްރައިމަރީގައި ވޯޓު ދެއްވައިރު އެންމެ ބޮޑަށް ވިސްނަންވީ ރިޔާސީ އިންތިޚާބު ކާމިޔާބުކުރެވޭނީ ކިހިނެއްތޯ؟ އިރާދަކުރެއްވިއްޔާ ރިޔާސީ އިންތިޚާބު ކާމިޔާބުކުރުމަށް އަޅުގަނޑަށް ބޭނުންވާ ވޯޓާއި ތާއިދު އަޅުގަނޑަށް ހޯދޭނޭ ކަމުގެ ޔަގީންކަން އަޅުގަނޑަށް މިހާރު އެބައޮތް. އެއީ ޝައްކެވެސް އޮތް ކަމެއްނޫން،" ރައީސް ވިދާޅުވިއެވެ.
ރައީސް ވިދާޅުވީ ރާއްޖެއަށް މިހާރު އަންނަމުންދާ ތަރައްގީ މެދުކެނޑިގެން ނުވާނޭ ކަމަށެވެ. އެތަރައްގީ މެދުނުކެނޑި ކުރިއަށްދާނީ އެމަނިކުފާނު ވެރިކަމަށް ހޮވައިގެން ކަމަށެވެ. "ވެރިކަމަށް ނާދެވިއެއް މިހާރަށްވުރެ ރަނގަޅު މާދަމާއެއް ހޯދަން ކުރާ މަސައްކަތް ކުރިއަށް ނުގެންދެވޭނެ،" ރައީސް ވިދާޅުވިއެވެ.
ރައީސް ވިދާޅުވީ މިމަހު 28 ވަނަ ދުވަހު ބާއްވާ އެމްޑީޕީގެ ރިޔާސި ޕްރައިމަރީއަކީ ޕާޓީގެ އެތެރޭގެ އިންތިޚާބަކަށްވުރެ ބޮޑަށް ރާއްޖޭގެ ކުރިމަގަށް ދެވޭ ވޯޓަކަށް ހެދުމަށް އެދިވަޑައިގެންނެވިއެވެ. ޕާޓީއާއި ރާއްޖޭގެ ކުރިމަގަށް ވެސް ރަނގަޅުވާނީ އެމަނިކުފާނު އިންތިޚާބުކޮށްގެން ކަމަށްވެސް ރައީސް ވިދާޅުވިއެވެ.
