އާޖެންޓީނާ އާއި އިނގިރޭސި ޕްރިމިއަރ ލީގުގެ ތާރިހުގައި އެންމެ އަގު ބޮޑު ކުޅުންތެރިޔާގެ ގޮތުގައި ހުނަރުވެރި މިޑްފީލްޑަރު އެންޒޯ ފެނާންޑޭޒް ރޭ ޗެލްސީއަށް ބަދަލުވެއްޖެއެވެ.
އެންމެފަހުގެ ވަރލްޑް ކަޕުގެ ޒުވާން އެންމެ މޮޅު ކުޅުންތެރިޔާގެ މަގާމްވެސް ހޯދި އެންޒޯ، ބެންފީކާއިން ޗެލްސީއަށް ބަދަލުވީ 107 މިލިޔަން ޕައުންޑުގެ ޓްރާންސްފީ އަކަށެވެ. ޕްރިމިއަރ ލީގުގެ ތާރިހުގައި މީގެ ކުރިން އެންމެ ބޮޑު ޓްރާންސްފާ ފީއެއް ދައްކާފައި ވަނީ އިނގިރޭސި ގައުމީ ޓީމުގެ މިޑްފީލްޑަރު ޖެކް ގްރީލިޝް ގަތުމަށް މެންޗެސްޓަރ ސިޓީއިން އެސްޓަންވިލާއަށެވެ. އަނެއްކޮޅުން އާޖެންޓީނާއަށް ނިސްބަތްވާ ކުޅުންތެރިންގެ ތެރެއިން މީގެ ކުރިން އެންމެ އަގުބޮޑު ޓްރާންސްފާއެއްގައި ކްލަބު ބަދަލު ކުރީ 2016 ވަނަ އަހަރު ނަޕޯލީއިން ޔުވެންޓަސް ބަދަލުވި ފޯވާޑް ގޮންޒާލޯ ހިގުއީންއެވެ. ޔުވެންޓަސްއަށް އޭނާ ބަދަލުވީ 75.3 މިލިޔަން ޕައުންޑުގެ ޓްރާންސްފާ ފީ އަކަށެވެ.
މިދިޔަ އަހަރުގެ އޮގަސްޓްމަހު ބެންފީކާއަށް އެންމެ 10 މިލިޔަން ޑޮލަރުގެ ޓްރާންސްފާ ފީއެއްގައި ބަދަލުވި އެންޒޯގެ ޓްފާންސްފާ ފީގެ އަގު ބޮޑުތަނުން މަތިވެގެންދިޔައީ އެންމެފަހުގެ ވަރލްޑް ކަޕް އާޖެންޓީނާއިން ކާމިޔާބު ކުރިިއިރު ޓީމުގެ މެދުތެރޭގައި އޭނާ ދެއްކި ތަފާތު މޮޅު ކުޅުމުގެ ސަބަބުންނެވެ. ޕާސްތައް އެކިއުރޭޓް އަދި ގޯލާ ރައްޓެހި އެންޒޯއަކީ ޗެލްސީއިން އައުސްކޮޑެއް ބިނާ ކުރަމުންދާ މަސައްކަތުގައި މުހިއްމު ދައުރެއް އަދާކުރާނެ ކުޅުންތެރިއެކެވެ.
ޓީމު ވަރުގަދަ ކުރުމުގެ ގޮތުން ޗެލްސީން ވަނީ ރޭ ނިމުނު ޓްރާންސްފާ ބާޒާރުގައި 288 މިލިޔަން ޕައުންޑް ހޭދަކޮށްފައެވެ. އަދި ޖޫން މަހުގެ ޓްރާންސްފާގައި 292 މިލިޔަން ޕައުންޑް އެކްލަބުން ހޭދަކުރިއެވެ. އެކަމަކު ލީގުގައި އެކްލަބު އޮތީ 10 ވަނައިގައެވެ.
