އިނގިރޭސި ޕްރިމިއަރ ލީގުގައި ތާވަލުގެ އެއްވަނައިގައި އޮތް އާސެނަލް، މިރޭ އެވަޓަން އަތުން 1-0 އިން ބަލިވުމުން ލީގް ހޯދުމުގެ ރޭހުގެ ފޯރިގަދަވެއްޖެއެވެ.
އެވަޓަންގެ ދަނޑުގައި ކުޅުނު މިމެޗުގައި ފެނިގެންދިޔަ ހަމައެކަނި ލަނޑު މެޗުގެ 60 ވަނަ މިނެޓުގައި ކާމިޔާބު ކޮށްދިނީ އިނގިރޭސިވިލާތުގެ ސެންޓްރަލް ޑިފެންޑަރު ޖޭމްސް ޓާކޮސްކީއެވެ. މިމެޗުން މޮޅުވިނަމަ، އާސެނަލްއަށް ތާވަލުގެ ކުރީގައި 8 ޕޮއިންޓުގެ ލީޑެއް ލިބުނީހެއެވެ. މިވަގުތު ތާވަލުގެ އެއްވަނައިގައި އާސެނަލް އޮތީ 50 ޕޮއިންޓާއެކުއެވެ. ދެވަނައިގައި، އެންމެފަހުގެ ޗެމްޕިއަން މެންޗެސްޓަރ ސިޓީ އޮތީ 45 ޕޮއިންޓާއެކުއެވެ.
މެޗުގެ ކޮންޓްރޯލް ނަގައި ގިނަވަގުތު ބޯޅަ ގެންގުޅުނު ނަމަވެސް އެވަޓަންގެ ގޯލަށް އަމާޒުކޮށް މާނުރައްކާތެރި ހަމަލާއެއް އާސެނަލްއަށް ފޮނުވާލެވިފައެއް ނުވެއެވެ. އެވަޓަންގެ ގޯލަށް އަމާޒުކޮށް އާސެނަލްއަށް ފޮނުވާލެވުނީ އެންމެ 3 ހަމަލާއެވެ. އެވަޓަނުން ވަނީ ކައުންޓަރ އެޓޭކްތަކުގައި 4 ހަމަލާ އާސެނަލްގެ ގޯލަށް އަމާޒުކޮށްފައެވެ.
މިއީ މިސީޒަނުގައި ޕްރިމިއަރ ލީގުގައި އާސެނަލް ބަލިވި ދެވަނަ މެޗެވެ. މިސީޒަނުގައި އާސެނަލް މިހާތަނަށް ބަލިވެފައި ވަނީ ހަމައެކަނި މެންޗެސްޓަރ ޔުނައިޓެޑް އަތުން އެކަންޏެވެ.
މިމެޗުން މޮޅުވުމުން ވަގުތީ ގޮތުން ރެލިގޭޝަން ޒޯނާ ފެޔަށް އެވަޓަނަށް ވަނީ ޖެހިލަފައެވެ. ލީގުގެ 17 ވަނައިގައި އެވަޓަން އޮތީ 18 ޕޮއިންޓާއެކުއެވެ. އެކަމަކު ތާވަލުގެ 18 ވަނައިގައި އޮތް ވުލްވޮސް އާއި 19 ވަނައިގައި އޮތް ބޯންމައުތުން ކުރެ ޓީމެއް، މިހަފްތާގައި އެދެޓީމު ކުޅެން ޖެހޭ މެޗުން މޮޅުވެއްޖެނަމަ އެވަޓަން އަލުން ރެލިގޭޝަން ޒޯނަށް ވެއްޓޭނެއެވެ.
