ނެގެޓިވް ޕީސީއާރު ޓެސްޓުގެ ނަތީޖާއާއެކު ރާއްޖެއިން ބޭރުން އަންނަ ދިވެހިންނާއި ވޯކް ވިސާގައި މާލެ ސަރަޙައްދަށް އަންނަ ފަރާތްތައް ކަރަންޓީނުވާން ނުޖެހޭކަމަށް އެޗްޕީއޭއިން ކަނޑައަޅައިފިއެވެ.
އެޗްޕީއޭއިން މިއަދު ވަނީ ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ޞިއްޙަތާއި ރައްކާތެރި ކަމަށް ޓަކައި، ޢާންމު ޞިއްޙަތު ރައްކާތެރިކުރުމުގެ ޤާނޫނުގެ ދަށުން އަޅާފައިވާ ބައެއް ފިޔަވަޅުތަކަށް ލުއިތަކެއް ދީފައެވެ.
އެގޮތުން ޕީ.ސީ.އާރު ނެގެޓިވް ނަތީޖާއާއެކު ރާއްޖެއިން ބޭރުން އަންނަ ދިވެހިންނާއި ވޯކް ވިސާގައި މާލެ ސަރަޙައްދަށް (މާލެ، ހުޅުމާލެ، ވިލިމާލެ)އަށް އަންނަ ފަރާތްތައް ކަރަންޓީނުވާން ނުޖެހޭގޮތަށް ނިންމެވި ނަމަވެސް އެންމެ ރަނގަޅު ގޮތަކީ ދިހަ ދުވަހުގެ މުއްދަތަށް މާސްކު އަޅައިގެން އުޅުމާއި ގޭގައި އެކަހެރިވެ ތިބުން ކަމަށެވެ.
އެޗްޕީއޭއިން ބުނީ އުސޫލަށް މިބަދަލު ގެނައުމަށް ނިންމާފައިވީނަމަވެސް ރާއްޖެއިން ބޭރުން އަންނަ މީހުންގެ ތެރެއިން ރަށްރަށް ދަތުރުކުރާ މީހުންނާއި ރިސޯޓުތަކަށް ދަތުރުކުރާ މީހުންނާއި ގްރޭޓަރ މާލެ ސަރަޙައްދަށް އަންނަ ސިއްޙީ ދާއިރާއާއި ތަޢުލީމީ ދާއިރާއާއި ދައުލަތުން މީހުން ބަލަހައްޓާ މަރުކަޒްތަކުގައި މަސައްކަތްކުރާ މުވައްޒަފުން 10 ދުވަހަށް ކަރަންޓީން ވާންޖެހޭނެއެވެ. އަދި މިފަރާތްތަކުން ކަރަންޓީން މުއްދަތު ހަމަކުރުމަށްފަހު ޕީސީއާރް ޓެސްޓު ހަދަންޖެހޭނެކަމަށް އެޗްޕީއޭއިން ބުނެއެވެ.
ރާއްޖެއިން ބޭރުން އަންނަ މީހުން 96 ގަޑިއިރުނުވާ ޕީސީއާރު ޓެސްޓެއް ގެންނަން ޖެހޭއިރު، 1 އަހަރުން ދަށުގެ ކުޑަކުދިން މިކަމުން އިސްތިސްނާވާނޭކަމަށް އެޗްޕީއޭއިން ބުނެއެވެ.
