ފެބްރުއަރީ 1، 2018 ގައި ސުޕްރީމް ކޯޓުން ނެރުނު އަމުރާ ގުޅިގެން އެ ކޯޓުގެ ފަނޑިޔާރުން މަސައްކަތް ކުރެއްވީ އަދުލު އިންސާފު ދަމަހައްޓަވާކަށް ނޫން ކަމަށާއި އުޅުއްވީ ގޮނޑި ހިމާޔަތް ކުރެއްވުމަށް ކަމަށް މަޝްހޫރު ދީނީ އިލްމުވެރިޔާ ޑރ. މުޙައްމަދު ޢިޔާޒް ވިދާޅުވެއްޖެއެވެ.
އިޔާޒު މިހެން ވިދާޅުވީ އެކެއް ފެބުރުއަރީގައި ކުރީގެ ރައީސް އަބްދުﷲ ޔާމީނުގެ އަމުރަށް ސުޕްރީމް ކޯޓުގެ "ޓިނު ނަގައިގެން" ފަނޑިޔާރުން ހައްޔަރުކުރި ވާހަކައަކީ ހަގީގަތާ ހިލާފު ވާހަކައެއް ކަމަށް ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވުމާ ގުޅިގެންނެވެ.
ދީދީ އަށް ރައްދު ދެއްވައި ޢިޔާޒް ކުރެއްވި ޓްވީޓެއްގައި ވިދާޅުވީ، ސުޕްރީމް ކޯޓުގެ ފަނޑިޔާރުން އުޅުއްވީ އަދުލު އިންސާފު ދަމަހައްޓަވާކަށް ނޫން ކަމަށާއި އެބޭފުޅުންގެ ގޮނޑި ގެއްލުނަ ނުދިނުމަށް ކަމަށެވެ. އަދި އެކަމުގެ ހިތި ނަތީޖާ މުޅި ޤައުމަށް ކޮށްފައިވާ ކަމަށް އިޔާޒް ވިދާޅުވިއެވެ.
"ދެންވެސް ރައްޔިތުންގެ ކިބައިން މާފަށް އެދި ތައުބާވުން އަވަސް ކުރަށްވާ." ޑރ. ޢިޔާޒް ވިދާޅުވިއެވެ.
ރައީސް ޔާމީންގެ ވެރިކަމުގައި ސުޕްރީމް ކޯޓްގެ ދެ ފަނޑިޔާރަކު ހައްޔަރުކުރީ ފެބްރުއަރީ 1، 2018 ގައި ނެރުނު ބޮޑު އަމުރާއި ގުޅިގެންނެވެ. އޭރު އުއްތަމަ ފަނޑިޔާރަކީ މަގާމުން ދުރުކުރި އަބްދުﷲ ސައީދެވެ. އެ އަމުރާއި ގުޅިގެން ސިފައިން ހައްޔަރުކުރީ އަބްދުﷲ ސައީދާއި އޭރު ކޯޓްގައި ހުންނެވި އެންމެ ސީނިއާ ފަނޑިޔާރު އަލީ ހަމީދެވެ.
އެއަށްފަހު ދެން އުއްތަމަފަނޑިޔާރު ކަމަށް ވަޑައިގެންނެވީ ޑރ. އަހުމަދު އަބްދުﷲ ދީދީ އެވެ.
