ޕްރޮގްރެސިވް ކޮންގްރެސް ކޯލިޝަނުން ރޭ ބޭއްވި މުޒާހަރާގައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ މޮޓޯކޭޑަށް ހުރަސް އެޅި މައްސަލާގައި 4 ފިރިހެނަކު ހައްޔަރު ކޮށްފައިވާކަމަށް ފުލުހުން ބުނެފިއެވެ.
"ރައީސުލްޖުމްހޫރިއްޔާގެ މޮޓޯކޭޑަށް ހުރަސްއެޅުމުގެ ތުހުމަތުގައި 4 ފިރިހެނުން ރޭ ފުލުހުންގެ ބެލުމުގެ ދަށަށް ގެނެވިފައިވޭ." ފުލުހުން ބުނެފައިވެއެވެ. އޭގެ ތެރޭގައި ނައިފަރު ދާއިރާގެ މަޖިލިސް މެމްބަރ އަހުމަދު ޝިޔާމް ވެސް ހިމެނޭ ކަމަށް ޕީޕީއެމުން ވަނީ ބުނެފައެވެ. އެހެނަސް މިހާރު އޭނާ ވަނީ މިނިވަން ކޮށްފިއެވެ.
މީގެ އިތުރުން ރޭގެ މުޒާހަރާއިން އިތުރު 18 މީހަކު ވަނީ ހައްޔަރުކޮށްފައި ކަމަށް ފުލުހުން ބުންޏެވެ. އޭގެ ތެރޭގައި ހިމެނެނި 8 ފިރިހެނުންނާއި 9 އަންހެނުން ކަމަށް ވެސް ފުލުހުން ވަނީ ބުނެފައެވެ.
އެމީހުން ހައްޔަރުކޮށްފައިވަނީ ފުލުހުންގެ ގާނޫނޫ ވާޖިބު އަދާކުރުމަށް ހުރަސް އެޅުމުގެ ތުހުމަތުގައި ކަމަށް ވެސް ފުލުހުން ބުނެފައިވެއެވެ. ރޭ ހައްޔަރުކުރި އެންމެން ވަގުތުން ދޫކޮށްލުމަށް ޕީޕީއެމުން ވަނީ ގޮވާލައިފައެވެ. މިއީ ސިލްސިލާކޮށް ޕީޕީއެމް/ޕީއެންސީި އިން ކުރިއަށް ގެންދާ މުޒާހަރާތަކެެކެެވެ. މުޒާހަރާގައި ގޮވާލަމުން ގެންދަނީ ރައީސް ޔާމީން މިނިވަން ކުރުމަށެވެ.
