ކީރިތިރަސޫލުﷲ صلى الله عليه وسلم ހަދީޘް ކުރައްވާފައިވެއެވެ. "ތިބާވީ ކޮންމެތަނެއްގައި މާތްﷲ އަށް ތަޤުވާވެރިވާށެވެ."
ދުނިޔެމަތީގައި އިންސާނާއަށް ލިބިފައިވާ އިއްޒަތަކާއި ގަދަރަކުން އޭނާއަކީ މާތްﷲގެ ހަޟްރަތުގައި މޮޅު މީހަަކަށް ނުވަތަ ދަރަޖަ އުފުލިގެންވާ މީހަކަށް ނުވެއެވެ. އެކަލާނގެ ޙަޟްރަތުގައި އަޅާގެ ދަރަޖަ އުފުލެނީ ތަޤުވާވެރިކަމުންނެވެ. އެމީހެއްގެ ތަގުވާވެރިކަން ވަރުގަދަ މީހާއަކީ ދެދުނިޔޭގެ ބާއްޖަވެރިއެކެވެ.
ތަޤުވާވެރިންނަކީ އެމީހުންގެ ޢަމަލުތަކުގައި އިސްލާމީ ރިވެތި ސިފަތައް ހަރުލައިފައިވާ ބައެކެވެ. މާތްﷲ އަށް ފުރިހަމައަށް ކިޔަމަންތެރިކަން އަދާކުރުމާއެކު ހުރިހާ ވަގުތެއްގައި ވެސް އެކަލާނގެ އަންގަވައިފައިވާ ގޮތަށް އުޅުން ބަހައްޓާ މީހުންނެވެ. ސޫރަތުލްބަޤަރާގެ 3 ވަނައާޔަތުން 5 ވަނަ އާޔާތާ ހަމައަށް މާތްﷲ ވަހީކުރައްވާފައިވަނީ މި ވާހަކަ ތަކެވެ.
"އެއުރެންނީ، ޣައިބަށް އީމާން ވާ، އަދި ނަމާދު ޤާއިމު ކުރާ، އަދި ތިމަންރަސްކަލާނގެ އެއުރެންނަށް ދެއްވި ތަކެތިން ހޭދަކުރާ މީހުންނެވެ. އަދި އެއުރެންނީ، ކަލޭގެފާނަށް ބާވައިލައްވާފައިވާ ފޮތަށާއި ކަލޭގެފާނުގެ ކުރިން ބާވައިލައްވާފައިވާ ފޮތްތަކަށް އީމާން ވާ މީހުންނެވެ. އަދި އެއުރެންނީ، ހަމަ އާޚިރަތްދުވަހާ މެދުގައި ޔަޤީން ކުރާ މީހުންނެވެ. އެއުރެންވަނީ، އެއުރެންގެ ވެރިރަސްކަލާނގެ ޙަޟްރަތުން އައި ތެދުމަގުގެ މަތީގައެވެ. އަދި ދިންނަވާނޭ މީހުންނީ، ހަމަ އެއުރެންނެވެ."
ކީރިތި ޤުރުއާންގައި، ސޫރަތުލް ޙަޝްރުގެ 18 ވަނަ އާޔަތުގައި މާތް ﷲ ވަހީކުރައްވާފައިވާ ބަސްފުޅުގެ މާނައިގައިވެއެވެ. "އޭ އީމާންވެއްޖެ މީސްތަކުންނޭވެ! ތިޔަބައިމީހުން ﷲ އަށް ތަޤުވާވެރިވާށެވެ! އަދި ކޮންމެ ނަފުސެއްމެ މާދަމާއަށްޓަކައި އިސްކޮށްފައިވާ ޢަމަލެއް ބަލާފާހުށިކަމެވެ! އަދި ތިޔަބައިމީހުން ﷲ އަށް ތަޤުވާވެރިވާށެވެ! ހަމަކަށަވަރުން، ﷲ އީ، ތިޔަބައިމީހުންކުރާ ކަންތައް މޮޅަށް ދެނެވޮޑިގެންވާ ރަސްކަލާނގެއެވެ."
ތަޤުވާވެރިންގެ ސިފަތަކާއި ބެހޭގޮތުން އަލްޙަސަނުލް ބަޞްރީ ވިދާޅުވެފައި ވެއެވެ. "ތަޤުވާވެރިން ދެނެގަނެވޭނެ ޢަލާމާތްތަކެއް ވެއެވެ. އެމީހުން ތެދުބުނާނެއެވެ. އެމީހުން ވަޢުދަށް ވަފާތެރިވާނެއެވެ. އެމީހުން ގާތްތިމާގެކަމުގެ ގުޅުން ދަމަހައްޓާނެ އެވެ. އެމީހުން ނިކަމެތީންނަށް އޯގާވެރިވާނެ އެވެ. އެމީހުން އެހެންމީހުންނަށް އެމީހުންގެ ހައިބަތު ދައްކާކަށް ނޫޅޭނެ އެވެ. އެމީހުން ޚުލްޤުހެޔޮވާނެ އެވެ. އެމީހުން މާތް ﷲ ގެ ޙަޟުރަތަށް ކުއްތަންވުމަށްޓަކައި ގަދައަޅައި މަސައްކަތްކުރާނެ އެވެ."
މިރޯދަމަހުގެ ބަރަކާތާއި ސަވާބާއި ދަރުމަ ލިބިގަތުމަށް އަވަސްވެގަނަންނަމާތޯއެވެ. ބަލަބަލައި ތިއްބާ ރޯދަމަސް ފެށިގެން ބާރު ދުވެލީގައި މިދަނީ ކުރިއަށެވެ. މިއީ ހަމަ ކުޑަކުޑަ ދުވަސްކޮޅެކެވެ. މަޖަލާއި ސަކަރާތުގައި މިމަހުގެ ދުވަސްތައް ނިންމާނުލާށެވެ. ﷲ ތައާލާގެ ހަޒުރަތުގައި ލޮބުވެތި، އެކަލާނގެ ލޯބިވާ އަޅުންގެތެރެއިން ވުމަށް ތަގުވާގެ ސިފައިން ސިފަ ލިބިގަންނަމާތޯއެވެ.
