ޗައިނާ ފަތުރުވެރިޔަކު ގެއްލިގެން އޭނާ ހޯދުމުގެ މަސައްކަތް އެމްއެންޑީއެފް ކޯސްޓްގާޑުން ދަނީކުރަމުންކަމަށް އެމްއެންޑީއެފްއިން ވިދާޅުވެއްޖެއެވެ.
މި ފަތުރުވެރިއަކީ ކ.އަމީންގިރިރިސޯޓުގެ ހުޅަނގުދެކުނު ފަރާތަށް ސްނޯކްލިންގ އަށް ދިޔަކަމަށް ބެލެވޭ މީހެއްކަމަށާއި އަދި އެމީހާ ގެއްލިގެން އުޅޭކަމުގެ މައުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިއު ކޯޑިނޭޝަން ސެންޓަރ (އެމް.އާރު.ސީ.ސީ) އަށް ލިބިފައިވަނީ 2023 އެޕްރީލް 02 ވަނަ ދުވަހުގެ 14:56 ހާއިރު ކަމަށްވެސް އެފަރާތުން ވަނީ ވިދާޅުވެފައެވެ.
އެގޮތުން، މި މައުލޫމާތު ލިބުމާއެކު ކޯސްޓްގާޑް ސެކަންޑް ސްކޮޑުރަންގެ ހާބަރ ކުރާފްޓް، ޑައިވަރުންނާއެކު އެސަރަޙައްދަށްގޮސް 16:19 ހާއިރު ސަރޗް އެންޑް ރެސްކިޔު އޮޕަރޭޝަން ފަށައި، މި ސަރަޙައްދުގެ އަންޑަރ ވޯޓަރ އަދި ސަރފޭސް ސާރޗް ކުރުމުގެ މަސައްކަތް ދަނީ ކުރަމުންނެވެ.
މީގެއިތުރުން މިއަދު އިތުރު ޑައިވަރުންނާއެކު ކޯސްޓްގާޑުގެ އެފް.އައި.ސީ ހަކުރާ ލޯންޗް މި އޮޕަރޭޝަންގައި ހަރަކާތްތެރިވެ މިހާތަނަށް 300 އަކަމީޓަރު ސްނޯކަލްކޮށް އަދި 800 އަކަމީޓަރުގެ އަންޑަރ ވޯޓަރ އޭރިޔާއެއް ވަނީ ޑައިވް ކޮށްގެން ބަލާފައެވެ.
އަދި މި ސަރޗް އެންޑް ރެސްކިއު އޮޕަރޭޝަން އިތުރަށް ފުޅާކުރުމުގެ ގޮތުން، އިތުރު ޑައިވަރުންނާއެކު ކޯސްޓްގާޑް ޝިޕް ޣާޒީ މިއަދު 13:30 ހާއިރުން ފެށިގެން އެސަރަޙައްދުގައި ދަނީ ހަރަކާތެރިވަމުންނެވެ. މިގޮތުން މިހާތަނަށް 87 އަކަ ނޯޓިކަލް މޭލުގެ ސަރަހައްދެއް ބެލުނު ނަމަވެސް މިހާތަނަށް މި ފަތުރުވެރިޔާގެ އެއްވެސް ނިޝާނެއް ފެނިފައެއްނުވާ ކަމަށް އެމްއެންޑީއެފްއިން ވިދާޅުވިއެވެ.
މީގެއިތުރުން، މި ފަތުރުވެރިޔާ ސްނޯކަލް ކުރުމަށް ބޭނުން ކުރިކަމަށް ބެލެވެނީ ޓްރާންސްޕޭރެންޓް މާސްކަކާއި ކަޅުކުލައިގެ ސްނޯކަލްއެއްގެ އިތުރުން ރީނދޫކުލައިގެ ސްޓްރައިޕް ދަމާފައި ހުރި ކަޅުކުލައިގެ ފިންސެއް ކަމަށާއި ފަތުރުވެރިޔާ ލައިގެން ހުރީ ނޫކުލައިގެ ސްވިމިންގ ޓްރަންކެއް ކަމަށް އެމްއެންޑީއެފް ކޯސްޓްގާޑަށް މަޢުލޫމާތު ލިބިފައިވެއެވެ.
އަދި އެމްއެންޑީއެފްއިން ވަނީ އެނާއާއި ބެހޭ އެއްވެސް ޚަބަރެއް ވޭތޯ މިސަރަޙައްދުން ދަތުރުކުރާ އުޅަނދު ފަހަރުން ބަލައިދިނުމަކީ ކޯސްޓްގާޑްގެ ވަރަށް ބޮޑު އެދުމެެއް ކަމުގައި ވިދާޅުވެފައެވެ.
