އިޒްރޭލުން މަސްޖިދުލް އަގްސާގައި އިއުތިކާފަށް ތިބި މީހުންގެ އަތާއި ފައިގައި ބިޑި އަޅުވައި 500 މީހުން އަނިޔާވެރި ގޮތަކަށް ހައްޔަރު ކުރި މައްސަލާގައި ހަރުކަށި ރައްދެއް ދޭނެ ކަމަށް ޙަމާސްއާއި އިސްލާމިކް ޖިހާދުން ބުނެފިއެވެ.
އެއަށްފަހު ފަލަސްތީނުގެ ހަނގުރާމަވެރިން އިޒްރޭލަށް 15 ހަމަލަ ފޮނުވުމުން އިޒްރޭލުންވެސް ވަނީ މަތިންދާބޯޓްތަކުން ބޮން އަޅާފައެވެ.
އިޒްރޭލުގެ ސަލާމަތީ ކަންކަމާ ބެހޭ ވަޒީރު އިޓަމާތް ބިން ގްވީރް ސިފައިންނަށް އަންގާފައި ވަނީ ފަލސްތީނު މީހުންނަށް ދޭ ހަމަލާތައް ވަރުގަދަ ކޮށްފައި ބޭއްވުމަށެވެ. އަދި ފަލަސްތީނު މީހުން ވުޖޫދުން ފޮހެލުމަށް ގޮވާލި މާލީ ވަޒީރު ސްމޮރިޗް ވެސް ބުނެފައި ވަނީ ފަޅު ތަންތަނަށް އިޒްރޭލު ސިފައިން ބޮން އެޅުމުގެ ބަދަލުގައި ފަލަސްތީނު މީހުން ދިރިއުޅޭ އާބާދީތަކަށް ބޮން އަޅަމުން ގެންދިއުމަށެވެ.
މަސްޖިދުލްއަގްސާއަށް އިޒްރޭލުން ޙަމަލަ ދިނުމާ ގުޅިގެން އުރުދުންއާއި މިސްރުގެ ގޮވާލުމަށް އަރަބި ލީގުން ވަނީ ދާއިމީ މަންދޫބުންގެ ފެންވަރުގައި ބައްދަލުވުމެއް ބޭއްވުމަށް ނިންމާފައެވެ.
އިޒްރޭލުގެ އުދުވާނީ އަމަލުތައް ކުށްވެރި ކުރި ގައުމުތަކުގެ ތެރޭގައި ޤަތަރާއި ސައުދިއްޔާއާއި މިސްރާއި އުރުދުންއާއި ކުވެއިތާއި މަޣްރިބާއި ތޫނުސް ލުބްނާން އަދި އިރާގާއި ސޫރިޔާއާއި ލީބިޔާއާއި އިމާރާތާއި ޖަޒާއިރާއި ހިމެނެއެވެ. އަދި ޔޫރަޕިއަން ޔޫނިއަންއާއި އިނގިރޭސިވިލާތުންވެސް ވަނީ މި އުދުވާން ކުށްވެރިކޮށްފައެވެ.
