އައްޑޫ ސިޓީ ހުޅުމީދޫގައި ކުޑަކުދިންގެ ހަވީރެއް ބާއްވައިފިއެވެ. މިއީ އެމްއެންޑީއެފް ސަދަން އޭރިއާ ކޮމާންޑްގައި މިހާރު ކުރިއަށްގެންދާ، 7 ވަނަ މެރިންކޯ ބޭސިކް ކޯހުގެ ފައިނަލް އެކްސަސައިޒްގެ ތެރެއިން ބޭއްވި ހަވީރެކެވެ.
އެމްއެންޑީއެފްއިން ވިދާޅުވީ މި ކުޑަކުދިންގެ ހަވީރަކީ "ކުޑަކުދިން ސިފައިންނާއެކު ރޯދަ ކުރުކުރުން" މި ނަމުގައި ކުރިއަށްގެންދިޔަ ހަވީރެއްކަމަށެވެ.
އެގޮތުުން، މިއަދު ހަވީރު ހުޅުމީދޫ ޕޮލިސް ދަނޑު ސަރަހައްދުގައި، ތަފާތު ކުޅިވަރު ހަރަކާތްތަކާއެކު ކުރިއަށްގެންދިޔަ މި ކުޑަކުދިންގެ ހަވީރުގައި އޮބްސްޓަކްލްކޯހާއި ހަތިޔާރާއެކު ފޮޓޯ ނެގުމުގެ އިތުރުން ސިފައިންގެ އަސްކަރީ ހުނަރުތައް ދައްކުވައިދޭ ހަރަކާތްތައް ވަނީ ކުރިއަށްގެންގޮސްފައެވެ.
މި ހަވީރަށް ގިނަ އަދަދެއްގެ ކުޑަކުދިންނާއި ބޮޑެތި މީހުން ވަނީ ޒިޔާރަތް ކޮށްފައެވެ.
