އައްޑޫ ސިޓީ ހިތަދޫ ކުނިގޮނޑުގައި އަލިފާން ރޯވި ސަރަހައްދުން ދުން އަރާތީ ދުން އެރުން ކޮންޓްރޯލް ކުރުމަށް، ޙާއްޞަ އޮޕަރޭޝަނެއް ފަށައިފިއެވެ. މި އޮފަރޭޝަނަކީ އެމްއެންޑީއެފް ސަދަން އޭރިއާ ކޮމާންޑާއި އައްޑޫ ސިޓީގެ މުއައްސަސާތައް ގުޅިގެން ގެންދާ އޮފަރޭޝަނެއްކަމަށް އެމްއެންޑީއެފްއިން ވިދާޅުވިއެވެ.
މީގެ އިތުރުން އެމްއެންޑީއެފްއިން ވިދާޅުވީ އައްޑޫ ސިޓީ ހިތަދޫ ކުނިގޮނޑުގައި ރޯވި އަލިފާން ކޮންޓްރޯލްކޮށްފައިވީ ނަމަވެސް އަދިވެސް އެސަރަހައްދުން ދުމުގެ އަސަރު ވަރަށްބޮޑަށް ކުރަމުންދާކަމަށެވެ.
މި އޮޕަރޭޝަންގައި، އަލިފާން ރޯވި ސަރަހައްދުގައި ހުރި ކުނިތަކުގެ އަޑީގައި އަލިފާނުގެ އަސަރު ހުރުމުން އެކްސްކަވޭޓަރެއް ބޭނުންކޮށްގެން އެސަރަހައްދު ކޮނެ ކުނިތައް އެއްފަރާތްްކޮށް، ފެން ޖަހައިގެން އަލިފާން ނިއްވުމުގެ މަސައްކަތް ދަނީ ކުރަމުންނެވެ.
މި މަސައްކަތުގައި އައްޑޫ ސިޓީ ކައުންސިލް، މޯލްޑިވްސް ޕޮލިސް ސަރވިސް، ގަން އިންޓަނޭޝަނަލް އެއަރޕޯޓް، އެމްޓީސީސީ، ޕޮލިސް އެކެޑަމީ، ވަން އޫޑްގެވެސް އެހީތެރިކަން ލިބެމުން އަންނަކަމަށް އެމްއެންޑީއެފްއިން ވަނީ ވިދާޅުވެފައެވެ.
