މި ސަރުކާރުން މާލޭގައި ވެހިކަލްތައް ޕާކުކުރުމަށް 8000 އަށްވުރެ ގިނަ ޖާގަ ހަދައިދީފައިވާކަމަށް ކަމަށް މާލޭ ސިޓީގެ މޭޔަރު ޝިފާ މުހައްމަދު ވިދާޅުވެއްޖެއެވެ.
ދައުލަތުގެ މީޑިއާ "ޕީއެސްއެމް" އަށް ދެއްވި އިންޓަވިއުއެއްގައި ފާއިތުވި ދޮޅު އަަހަރުގެ ތެރޭގައި ކޮށްފައިވާ މަސައްކަތްތަކަށް އަލިއަޅުއްވާލައްވަމުން މޭޔަރު ވިދާޅުވީ ޕާކިން ޒޯންތަކުގެ ގޮތުގައި އެތައް ތަނެއް ހުޅުވިފައިވާ ކަމަށެވެ. އެގޮތުން، މިހާތަނަށް ޕާކު ކުރާނެ ތަންތަނުގެ ގޮތުގައި 8000 ޖާގައެއް ގާއިމްކޮށްދެވިފައިވާކަމަށް ސިފާ ވިދާޅުވިއެވެ. ސަރުކާރުން ވެފައިވާ ޕާކް ކުރާނެ ޖާގަތައް ދެއްކުމުގެ ވައުދު ފުއްދައި އާންމުންނަށް އެކަން ފެންނަމުންދާކަމަށް މޭޔަރު ވިދާޅުވިއެވެ.
"ބުރިބުރިއަށް ހުންނަ ޕާކިން ސްޕޭސް ތަރައްގީކުރުމުގެ މަސައްކަތް ފެށުމަށް އަންނަނީ މަސައްކަތް ކުރަމުން" މޭޔަރު ޝިފާ ވިދާޅުވިއެވެ.
މޭޔަރު ޝިފާ ވިދާޅުވީ، އިތުރު ހަތަރު ފަސް ޕާކިން ސަރަހައްދެއްގެ މަސައްކަތް ވަރަށް އަވަހަށް ފެށިގެންދާނެ ކަމަށެވެ. އަދި ކުރިއަށް އޮތް ކައުންސިލް އިންތިޚާބުން އަލަށް އިންތިޚާބުވާ ކައުންސިލުންވެސް، މިހާރު މިފަށާ މަސައްކަތްތައް ހުއްޓާނުލައި ކުރިއަށްގެންދާނެކަމަށް އުންމީދުކުރައްވާ ކަމަށް ޝިފާ ވިދާޅުވިއެވެ.
ޝިފާ އިތުރަށް ވިދާޅުވީ، މާލެ ސިޓީ ކައުންސިލްގެ މަސައްކަތްތަކާ މެދު ހިތްހަމަޖެހޭ ކަމަށާއި ގިނަ އާންމު ރައްޔިތުންވެސް އެކަން ގަބޫލުކުރައްވާ ކަމަށެވެ. މާލެ ސިޓީގެ އެކި ހިސާބުތަކުގައި ތަރައްގީގެ އެކި މަސައްކަތްތައް ކުރިއަށް ގެންދެވިފައިވާކަން މޭޔަރު ފާހަގަކުރެއްވިއެވެ.
