ތިލަމާލެ ބުރިޖުގެ މަސައްކަތަށް ގެންގުޅު ބާޖެއް ވިލިމާލެ ފަރަށް އަރާފައިވާކަމަށް ބުނާ ވާހަކަ އެފްކޮންސްއިން ދޮގުކޮށްފިއެވެ.
ބުރިޖުގެ މަސައްކަތަށް ބޭނުންކުރާ ބާޖެއް ރޭ 23:00 ހާއިރު ވިލިމާލޭ ފަރަށް އަރާފައިވާ ކަމަށް ބުނެ ވިލިމާލޭގެ އަތިރިމަތި ހިމާޔަތްކުރުމުގެ މަސައްކަތްތައް ކުރާ އަމިއްލަ ޖަމިއްޔާއެއް ކަމަށްވާ "ސޭވް ދަ ބީޗް"ގެ ޓުވިޓާ އެކައުންޓުން ވަނީ ޓުވީޓެއް ކޮށްފައެވެ. ބާޖުގެ ވީޑިއޯއަކާއެކު ކޮށްފައިވާ އެ ޓުވީޓުގައި ބުނެފައިވަނީ ވިލިމާލޭގެ ހުޅަނގު ދެކުނު ފަޅަށް ބާޖެއް އަރާފައިވާ ކަމަށެވެ.
ތިލަމާލެ ބްރިޖް ޕްރޮޖެކްޓް މެނޭޖަރު މުހައްމަދު ޖިނާން މީޑިއާގައި ވިދާޅުވެފައިވާ ގޮތުގައި އެ ބާޖު ފަރަށް ނާރައެވެ. އެކަން ޔަގީން ކޮށްފައިވާ ކަމަށް ޖިނާން ވިދާޅުވިއެވެ. ބާޖުގެ އެއްފަރާތުގެ ނަގިލި ކަހާލައިގެން ފަރާ ވަރަށް ކައިރިއަށް ދިއުމުން ވަގުތުން ފަރާ ދުރަށް ޖެއްސި ކަމަށް ޖިނާން ވަނީ ވިދާޅުވެފައެވެ.
ޖިނާން ވިދާޅުވީ ފަރަށް ގެއްލުމެއް ނުވާކަން ޔަގީން ކުރުމުގެ ގޮތުން އެފްކޮންސްގެ ޑައިވަރުން ވިލިމާލޭ ފަރުގެ ސަރަހައްދު މިހާރު ބަލަމުންދާ ކަމަށެވެ.
މިދިޔަ އަހަރުގެ އޮގަސްޓް މަހު ބުރިޖުގެ މަސައްކަތުގައި ބޭނުން ކުރާ އުޅަނދެއް ވިލިމާލޭ ފަރަށް އެރުމުން ބޮޑެތި ގެއްލުންތަކެއް ލިބިފައިވެއެވެ. އެފަހަރު ވަނީ ފަޅުގައި ފުން ވަޅުގަނޑުތަކެއް ހެދިފައިވެއެވެ. އެފްކޮންސް އަށް އެ އުޅަނދު ފަރުމަތިން ނެގުނީ ދެ ހަފުތާގެ މަސައްކަތުންނެވެ.
