ފުއްގިރި މައްސަލައިގައި، ކްރިމިނަލް ކޯޓުން ޝަރީއަތުގެ ކުރިން ނިންމި ނިންމުން ކުރީގެ ރައީސް އަބްދުﷲ ޔާމީންގެ ފަރާތުން ސުޕްރީމް ކޯޓުގައި އިސްތިއުނާފު ކުރި މައްސަލައިގެ އަޑުއެހުންތައް މިއަދު ނިންމާލައިފި އެވެ.
ރ. ފުއްގިރި މައްސަލައިގައި ޔާމީންގެ މައްޗަށް އުފުލާފައި ވަނީ ރިޝްވަތު ޤަބޫލުކުރުމާއި މަނީ ލޯންޑްރިންގެ ދައުވާ އެވެ.
މި މައްސަލައިގައި ޝަރީއަތުގެ ކުރިން ހުށަހަޅާ ހުށަހެޅުމާމެދު ކްރިމިނަލް ކޯޓުން ނިންމި ނިންމުމާމެދު ހިތްހަމަނުޖެހިގެން ރައީސް ޔާމީންގެ ފަރާތުން ހައިކޯޓުގައި މައްސަލަ ވަނީ އިސްތިއުނާފު ކޮށްފައެވެ. އަދި ހައިކޯޓުން ވަނީ ކްރިމިނަލް ކޯޓުގެ ނިންމުމަށް ތާއީދު ކޮށްފައެވެ. އެހެންކަމުން ޔާމީންގެ ފަރާތުން އެ މައްސަލަ ވަނީ ސުޕްރީމް ކޯޓުގައި އިސްތިއުނާފު ކޮށްފައެވެ.
މައްސަލައިގެ މިއަދު ބޭއްވި ޝަރީއަތުގައި ޔާމީންގެ ފަރާތުން އެ މަނިކުފާނުގެ ގާނޫނީ ވަކީލު ޑރ. މުހައްމަދު ޖަމީލް އަހުމަދު ވިދާޅުވީ ދައުވާ ލިބޭ ފަރާތަކަށް ގާނޫނުން ލިބިދޭ މަންފާތަކާއި މައްސަލައަކާ ގުޅިގެން ދައުލަތުގެ އޮފީސްތަކުގައި ހުންނަ ދިފާއީ ހެކިތައް ހޯދުމަށް ވަރަށް ބުރަކޮށް މަސައްކަތް ކުރައްވަން ޖެހޭ ކަމަށެވެ. އެގޮތުން ހެކި ހޯދުމުގެ ގޮތުން މައުލޫމާތު ހޯދާ ލިބިގަތުމުގެ ގާނޫނުގެ ދަށުންވެސް ޓޫރިޒަމް މިނިސްޓްރީއަށް ހުށަހަޅާފައިވާނެ ކަމަށާއި ނަމަވެސް ދިފާއަށް ބޭނުންވާ އެ ލިޔެކިޔުންތައް ލިބިފައިނުވާ ކަމަށް އޭނާ ވިދާޅުވިއެވެ.
ދައުލަތުން ވިދާޅުވީ ޔާމީންގެ ފަރާތުން އެދޭ ގޮތަށް ހެއްކާބެހޭ ގާނޫނު މި މައްސަލައަށް ތަދުބީގު ކުރަން ނުޖެހޭ ކަމަށާއި އެއީ މާ ކުރިން ހިނގާފައިވާ މައްސަލައަކަށްވުމުން ކަމަށެވެ. ދައުލަތުން ވިދާޅުވީ ޔާމީންގެ ފަރާތުން އެދޭ ގޮތަށް ކަންކަން ނުކޮށްދިނަސް، އިންސާފަށް ވާސިލުވުމަށް ހުރަހެއް ނެތް ކަމަށެވެ.
ދައުލަތުގެ ވާހަކަތަކަށް ނިމުމުން މައްސަލަ ބައްލަވާ ފަނޑިޔާރުން ވަނީ ހުލާސާ ގޮތެއްގައި ވާހަކަ ދެއްކެވުމަށް ހުރިހާ ފަރާތްތަކަށް ފުރުސަތު ދެއްވައިފައެވެ. އެ ފުރުސަތުގައި ދައުލަތުންނާއި ޔާމީން އަދި ކްރިޒް ރިޒާގެ ފަރާތުން ވަނީ ހުލާސާ ބަޔާން އިއްވައިފައެވެ.
ހުލާސާ ބަޔާން އިއްވައި ނިމުމުން، އަންނަ ހޯމަ ދުވަހުގެ ނިޔަލަށް މައްސަލައިގެ ހުކުމް އިއްވުމަށް މަސައްކަތް ކުރައްވާނެ ކަމަށް މައްސަލަ ބައްލަވާ ފަނޑިޔާރުންގެ ބެންޗުގެ ރިޔާސަތުގައި އިންނެވި ފަނޑިޔާރު ހުސްނުއްސުއޫދު ވަނީ ވިދާޅުވެފައެވެ ފަނޑިޔާރު ވިދާޅުވީ މިއަދުގެ އަޑު އެހުމާއެކު މައްސަލައިގެ ޝަރީއަތް ނިމިފައިވާ ކަމަށެވެ.
ސުޕްރީމް ކޯޓުން އެ މައްސަލަ ބައްލަވަނީ ފަނޑިޔާރު ހުސްނުއްސުއޫދާއި ފަނޑިޔާރު އައިޝާ ޝުޖޫން މުހައްމަދާއި ފަނޑިޔާރު ޑރ. މުހައްމަދު އިބްރާހިމެވެ. ބެންޗުގެ ރިޔާސަތަކީ ފަނޑިޔާރު ސުއޫދެވެ.
