އެމެރިކާގެ ކުރީގެ ޚާރިޖީ ވަޒީރު ޔަހޫދީ ހެންރީ ކިސިންޖަރުގެ އުމުރުން 100 އަހަރު ވަނީއެވެ. މީސްމީޑިއާގައި މީހުން ބުނެފައި ވަނީ އޭނާ ތަމްސީލު ކޮށްދެނީ، 100 އަހަރުގެ ޝައިތާނީ ވަންތަކަމެކެވެ.
ގިނަބަޔަކު ބުނަނީ އޭނާއަކީ ހަނގުރާމައިގެ މުޖުރިމެއް ކަމަށެވެ. އަދި އެމެރިކާގެ ޕޮލްޕޮޓް، ޝަރީއަތަށް ހާޒިރުކުރުމަށްވެސް ގޮވާލާފައި ވެއެވެ.
ކިސިންޖަރުގެ އުފަންދުވަސް މި މަހުގެ 27 ވަނަ ދުވަހު ފާހަގަ ކުރާނެއެވެ. މީގެ ދެ ދުވަސް ކުރިން އެމެރިކާގެ ސީބީއެސް ނެޓްވޯކަށް ދިން ޓީވީ އިންޓަވިއުއަކަށް ފަހު އޭނާގެ ނަން މުވާސަލާތީ ސައިޓްތަކުގައި ވަނީ އާންމު ވެފައެވެ.
ކިސިންޖަރަކީ އަނިޔާވެރި ކަންކަން ހިންގައިގެން އިރިއުޅުމެއް ބިނާ ކުރި މީހެކެވެ. ސިޔާސީ ހިޔަޅެކެވެ. މި ޔަހޫދީ މީހާ ވަނީ ވިއެޓްނާމް ހަނގުރާމަ ކޮށްފައި އަދި ފަހުން އެމެރިކާ އާއި ވިއެޓްނާމްއާ ދެމެދު ސުލްހައިގެ ވާހަކަތައް ބާއްވައި ހަނގުރާމަ ހުއްޓުވުމުގައި 1973 ވަނަ އަހަރު ނޮބެލް ސުލްހައިގެ އިނާމު ވެސް ހޯދާފައެވެ.
ދިހަވަރަކަށް އަހަރުގެ ތެރޭގައި ކެމްބޯޑިއާ އާއި ލާއޯސްގައި 900،000 އާންމުން ކިސިންޖާގެ ސިޔާސަތުން މަރުވި ކަމަށް ތުހުމަތު ކުރެވެ އެވެ. އެމެރިކާގެ ސްޓޭޓް ޑިޕާޓްމަންޓުގެ އަރުޝީފުން ދައްކާ ގޮތުގައި 1969 ވަނަ އަހަރު ނޭޝަނަލް ސެކިއުރިޓީ އެޑްވައިޒަރުގެ މަގާމުގައި ހުންނެވި ކިސިންޖާ ވަނީ ވިއެޓްނާމް އާއި ލާއޯސްގެ ބޯޑަރު ސަރަހައްދުތަކަށް ހަމަލާ ދިނުމަށް އޭރު ރައީސް ރިޗާޑް ނިކްސަން އަށް ލަފާ ދީފަ އެވެ.
ހިއުމަން ރައިޓްސް ވޮޗް ފަދަ ބައިނަލްއަގްވާމީ އިންސާނީ ހައްގުތަކާ ބެހޭ ޖަމިއްޔާތަކުން ލަފާކުރާ ގޮތުގައި ކެމްބޯޑިއާގައި އެމެރިކާއިން ކެމިކަލް އެޅި ހަމަލާތައް ދީގެންނާއި ބޮން އަޅައިގެން ހަމަލަ ދީގެން އާންމުންގެ 600،000 މީހުން މަރާފައި ވެއެވެ. އަދި ލާއޯސްގައި ގާތްގަނޑަކަށް ތިން ލައްކަ މީހުން މަރާފައި ވެއެވެ.
އެމެރިކާގެ މަޝްހޫރު ޔޭލް ޔުނިވާސިޓީން ބުނީ އެމެރިކާގެ މަތިންދާބޯޓުތަކާއި އާޓިލަރީތަކުން ކެމްބޯޑިއާ އާއި ލާއޯސް އަށް ގާތްގަނޑަކަށް 2.8 މިލިއަން ޓަނުގެ ގޮވާތަކެތި އޮއްސާފައިވާ ކަމަށެވެ.
