އާބަންކޯއިން އިންޓަނޭޝަނަލް އެއިޑް ކެމްޕޭއިން (އައިއޭސީ) އާ ގުޅިގެންް ހަނގުރާމާގައި ސުންނާފަތި ވެފައިވާ މުސްލިމް ގައުމުތަކަށް އެހީވުމަށް ނިންމައިފިއެވެ.

އެގޮތުން އައިއޭސީ ގެ ފަރާތުން ހިންގާ ހަރަކާތްތަކުގައި އެހީތެރިކަން ފޯރުކޮށްދީ، އެތަނުގެ ހަރަކާތައް ޕްލޭންކޮށް ފަރުމާކުރުމުގައި އާބަންކޯއިން ހަރަކާތްތެރިވާނެކަމަށް ބުނެފައި ވެއެވެ. މި ކަމަށް އާބަންކޯއާއި އައިއޭސީ އާއެކު އިއްޔެ ވަނީ އެމްއޯޔޫ އެއްގައި ސޮއިކޮށްފައެވެ.

އާބަންކޯގެ ފަރާތުން ސޮއި ކުރެއްވީ އާބަންކޯގެ މެނޭޖިން ޑިރެކްޓަރު އަހުމަދު އާތިފްއެވެ. އަދި އައިއޭސީ ގެ ފަރާތުން ސޮއި ކުރެއްވީ ޗެއާމަން އަހުމަދު އިގްބާލްއެވެ. އައިއޭސީގެ މައިގަނޑު މަގްސަދަކީ އެހީތެރިކަން ބޭނުންވެފައިވާ ގައުމުތަކަށް އެހިތެރިކަން ފޯރުކޮށްދިނުމަށް ބޭނުންވާ ހުއްދަ ހޯދައި އެކަމަށް ކުރަންޖެހޭ ކަންތައްތައް އާބަންކޯއަށް ފަހިކޮށްދިނުން ކަމަށް އައިއޭސީ އިން ބުންޏެވެ.އަދި މިހާރުވެސް އައިއޭސީ އިން ވަނީ ދުނިޔޭގެ އެކި ކަންކޮޅުތަކާއި ސީރިއާ ފަދަ ހާލުގައި ޖެހިފައިވާ ގައުމުތަކަށް ބޭނުންވާ ފައިސާގެ އެހީ އާއި ކާބޯތަކެއްޗާއި އެހެނިހެން ޒަރޫރީ ބޭނުންތަކަށް އެހީތެރިވެ ދީފައެވެ.

މި އެއްބަސްވުމުގެ ދަށުން އާބަންކޯއިން ކުރަން ހަމަޖެހިފައިވާ ކަންތައްތަކުގެ ތެރޭގައި އައިއޭސީން ފާހަގަކުރާ ސަރަހައްދުތަކަށް ބޭނުންވާ އެހީ ފޯރުކޮށްދިނުމަށް، އެ ތަނަކަށް ހާއްސަ ޕްލޭންތައް ފަރުމާކުރާނެއެވެ. އަދިފަރުމާކުރާ ޕްލޭންތަކަކީ މުޖުތަމައުގެ ބޭނުންތައް އެންމެ އެކަށީގެންވާ ގޮތަކަށް ފުއްދައިދޭނެ ޕްލޭނެއްކަން ޔަގީންކުރުމަށް ހާއްސަ ޓީމަކުން މަސައްކަތްކުރާނެއެވެ ވިލެޖް ނުވަތަ ނެއިބަހުޑް މާސްޓަޕްލޭންގެ ކޮންސެޕްޓްތައް ތަރައްގީކުރުމުގެ މަސައްކަތް ކުރިއަށް ގެންދެވޭނެއެވެ.

އަދި މަޝްރޫއު ހިންގާ ތަން ބަލައި އެ މަޝްރޫއެއް ދެކޮޅު ޖެހޭތޯ ހަދަން ޖެހޭ ދިރާސާ ހެދުމާއި އުމްރާނީ ތަރައްގީގެ ޕްލޭން ހެދުމާއި އެ ތަނެއް ފަރުމާތައް ހެދުމާއި އިމާރާތްކުރުމާއި އެ މަސައްކަތުގެ ފެންވަރު ބެލުން ފަދަ ކަންކަމުގައި އެހީތެރިކަން ފޯރުކޮށްދޭނެ ކަމަށް އެއްބަސްވުމުގައިވެއެވެ.

މީގެއިތުރުން އާބަންކޯއިން ބުނީ "މިއީ އައިއޭސީގެ އިސްނެގުމުގެ މަތިން ސޮއިކުރި އެމްއޯޔޫއެއް ކަމަށެވެ. އަދި މިއީ އާބަންކޯގެ ފަރާތުން މުޖުތަމައުތަކަށް އެހީތެރިކަން ފޯރުކޮށްދީ، އެންމެނަށް ވެސް ރައްކާތެރި، އަމާން މާހައުލެއް ގާއިމްކޮށްދިނުމަށް ކުރާ މަސައްކަތުގެ ބައެއް ކަމަށް ވެސް އެ ކުންފުނިން ބުންޏެވެ."

އިތުރު ލިޔުންތައް އާބަންކޯ