ރަޝިޔާގެ ވެރިރަށް މޮސްކޯގެ އިމާރާތްތަކަކަށް ޔޫކްރައިނުން ޑްރޯން ބޭނުން ކޮށްގެން މިއަދު ހެނދުނު ހަމަލާތަކެއްދީ ރަޝިޔާ ސިއްސުވާލައިފިއެވެ
ލިބުނީ ކިހާވަރެއްގެ ގެއްލުމެއް: ތަހުގީގު ކޮމިޓީން ބުނީ ބައެއް އިމާރާތްތަކަށް ކުދިކުދި ގެއްލުންތަކެއް ލިބިފައިވާ ކަމަށެވެ. މީގެ އިތުރުން މޮސްކޯގެ މޭޔަރު ސަރގޭ ސޮބިއަނިން ވިދާޅުވީ ދެ މީހަކަށް އަނިޔާވި ނަމަވެސް އެއްވެސް މީހަކު ހޮސްޕިޓަލުގައި އެޑްމިޓްކޮށްގެން ފަރުވާން ދޭން ޖެހިފައި ނުވާ ކަމަށެވެ.
ރަޝިޔާގެ ބަސް: ރަޝިޔާގެ ޑިފެންސް މިނިސްޓްރީން ބުނީ މިއަދު ހެނދުނު ވަގުތެއްގައި ޑްރޯން ބޭނުންކޮށްގެން މޮސްކޯއަށް "ޓެރަރިސްޓް ހަމަލާއެއް" ދިނުމުގެ ޒިންމާ ޔޫކްރޭނުން ނަގަންޖެހޭނެ ކަމަށެވެ.
އެ މިނިސްޓްރީން ނެރުނު ބަޔާނެއްގައި ބުނީ ރަޝިޔާގެ ވެރިރަށް މޮސްކޯއަށް ފޮނުވާލި 8 ޑްރޯން ނައްތާލާފައިވާ ކަމަށެވެ. ރަޝިޔާގެ އިންވެސްޓިގޭޓިވް ކޮމިޓީން ބުނެފައިވަނީ، ވައިގެ ދިފާޢީ ބާރުތަކުން، މޮސްކޯއާ ދިމާއަށް ދަތުރު ކުރި ގިނަ އަދަދެއްގެ ޑްރޯންތައް ވައްޓާލި ކަމަށެވެ. "އެ ޖަރީމާގައި ބައިވެރިވި މީހުން ދެނެގަތުމުގެ މަސައްކަތް ދަނީ ކުރަމުން،" އޭގައި ބުނެފައިވެ އެވެ.
ޔޫކްރައިނުގެ ބަސް: މިހާދިސާއާ ގުޅޭ ގޮތުން ޔޫކްރޭންގެ ބަހެއް އަދި ބުނެފައެއް ނުވެ އެވެ. ރިޕޯޓްތައް ބުނާ ގޮތުން މޮސްކޯއަށް ޑްރޯން ހަމަލާތައް އަމާޒުވެފައި މިވަނީ، ރަޝިޔާއިން ޑްރޯން ބޭނުންކޮށްގެން ވަރުގަދަ ހަމަލާތަކެއް ކިޔޭވްއަށް ދިންތާ ގަޑިއެއްހާއިރު ފަހުންނެވެ. ރަޝިޔާއިން ދިން ޑްރޯން ހަމަލާތަކުގައި އުމުރުން 33 އަހަރުގެ އަންހެނަކު މަރުވެ 13 މީހަކު ޒަޚަމްވެފައިވާ ކަމަށް ޔޫކްރޭންގެ ނޭޝަނަލް ޕޮލިސް އިން ބުނެފި އެވެ.
ރަޝިޔާއަށްދިން ހަމަލާތަކަށްފަހު ބޮޑު ނުތަނަވަސްކަމެއް ކުރިމަތިވެފައި ވީނަމަވެސް އެގައުމުގެ އެއްވެސް އެއަރޕޯޓެއް އަދި މިހާތަނަށް ބަންދުކޮށްފައެއް ނުވެއެވެ.
