މޮސްކޯ، މެއި 31: އިނގިރޭސިވިލާތުން ރަޝިޔާއާ ދެކޮޅަށް އިއުލާން ނުކޮށް ހަނގުރާމައެއް ކުރަމުންދާ ކަމަށާއި، އޭގެ މާނައަކީ އިނގިރޭސިވިލާތުގެ ކޮންމެ އޮފިޝަލަކީ ރަޝިޔާގެ އަސްކަރީ އަމާޒެއްގެ ގޮތުގައި ދެކިލެވޭނެ ކަމަށް ރަޝިޔާގެ ސަލާމަތީ މަޖިލީހުގެ ނައިބު ރައީސް ޑިމިޓްރީ މެޑްވެޑޭވް ވިދާޅުވެއްޖެ އެވެ.
ކުރިން ރަޝިޔާގެ ބޮޑުވަޒީރުކަންވެސް ކުރައްވާފައިވާ މެޑްވެޑޭވް އިނގިރޭސިވިލާތަށް ބަހުގެ ހޫނު ހަމަލާތަކެއް ދެއްވާފައި މިވަނީ ޔޫކްރައިނަށް އަސްކަރީ ސާމާނާއި މުވައްޒަފުން އިނގިރޭސި ސަރުކާރުން ފޯރުކޮށްދޭ މައްސަލައިގައެވެ.
"މިއަދު ގްރޭޓް ބްރިޓަން އިން ހަރަކާތްތެރިވަނީ ޔޫކްރޭންގެ އެކުވެރިއެއްގެ ގޮތުގައި، އަސްކަރީ އެހީތެރިކަމުގެ ގޮތުގައި އެގައުމަށް ސާމާނާއި މުވައްޒަފުން ފޯރުކޮށްދީގެން، އެއީ ޑިފެކްޓޯކޮށް ރަޝިޔާއާ ދެކޮޅަށް އިއުލާން ނުކުރާ ހަނގުރާމައެއް. އެހެންކަމުން އެގައުމުގެ [އިނގިރޭސިވިލާތުގެ] ކޮންމެ އޮފިޝަލަކީވެސް ރަޝިޔާގެ އަސްކަރީ އަމާކަށް ވުމުގެ ފުރުސަތު އެބައޮތް" މެޑްވެޑޭވް ޓްވިޓާގައި ލިޔުއްވާފައިވެ އެވެ.
އިނގިރޭސި ސަރުކާރުން އިއްޔެ ރަޝިޔާއަށްދިން ޑްރޯން ހަމަލާތައް ޖަސްޓިފައިކޮށް، އަމިއްލަ ދިފާއުގައި ރަޝިޔާގެ ބިމުގައި ހުންނަ އަމާޒުތަކަށް ހަމަލާދިނުމުގެ ހައްގު ޔޫކްރޭނަށް ލިބިގެންވާ ކަމަށް ވަނީ ބުނެފައެވެ.
"އިނގިރޭސިވިލާތުގެ މޮޔަ އޮފިޝަލުން، އަޅުގަނޑުމެންގެ އަބަދުގެ އަބަދުގެ ދުޝްމަނުން ހަނދާންކުރަންޖެހޭ ކަމަކީ، ހޭގް އަދި ޖެނީވާ މުއާހަދާތައް ހިމެނޭ ގޮތަށް، ޒަމާނީ ހާލަތުގައި ހަނގުރާމަ ހިންގުމަށް އާންމުކޮށް ގަބޫލުކުރެވޭ ބައިނަލްއަގްވާމީ ގާނޫނުތަކުގެ ދަށުން، އެމީހުންގެ ހާލަތު ވެސް ހަނގުރާމައިގައި އޮތް ކަމަށް ދެކެވިދާނެ " މެޑްވެޑޭވް ވިދާޅުވިއެވެ.
