އުތުރު ކޮރެއާއިން ފުރަތަމަ ފަހަރަށް އުދުއްސާލި ޖާސޫ ސެޓްލައިޓް މަންޒިލަށް ވާސިލުނުވެ މިއަދުގެ ވަގުތެއްގައި ކަނޑަށް ވެއްޓިފައިވާ ކަމަށް އެގައުމުން އެއްބަސްވެއްޖެއެވެ
ޖާސޫސީ ސެޓްލައިޓް ވެއްޓިފައި ވަނީ ކޮރެއަން ޕެނިންސުއެލާގެ ހުޅަނގު ކަނޑަށެވެ. މަލިގްޔަންގް-1 ގެ ނަން ދީފައިވާ ޖާސޫސީ ސެޓްލައިޓް ވެއްޓުމުން އުތުރު ކޮރެއާއިން ނެރެނުނު ބަޔާނުގައި ބުނީ މިފަހަރު ނާކާމިޔާބުވިނަމަވެސް މަސައްކަތް ހުއްޓާނުލާނެ ކަމަށެވެ.
އުތުރު ކޮރެއާގެ ނޭޝަނަލް އެއަރޮސްޕޭސް ޑިވެލޮޕްމަންޓް އެޑްމިނިސްޓްރޭޝަނުން ނެރެނުނު ބަޔާނުގައި ބުނީ ސެޓްލައިޓް ނާކާމިޔާބުވި ސަބަބުތައް ދެނެގަތުމަށް ވީހާވެސް އަވަހަކަށް ތަހުގީގުކޮށް އުނިކަމެއް ހުރިނަމަ އެކަން ހައްލުކުރާނެކަމަށެވެ.
ދެކުނު ކޮރެއާގެ ޖޮއިންޓް ޗީފްސް އޮފް ސްޓާފުން ބުނީ ދެކުނު ކޮރެއާގެ އީއޯޗެއޮންގް ޖަޒީރާގެ ހުޅަނގުން ގާތްގަނޑަކަށް 124 މޭލު ދުރުގައި އޮންނަ ކަނޑުގެ ސަރަހައްދުން ސެޓްލައިޓުގެ ބައިތައް ހޯދުމުގެ މަސައްކަތް ކުރަމުން އަންނަ ކަމަށެވެ. ދެކުނު ކޮރެއާގެ ނޭޝަނަލް ޑިފެންސް މިނިސްޓްރީން ވަނީ ސެޓްލައިޓުގެ ބައެއް ބައިތަކުގެ ފޮޓޯތައް މީޑިޔާއާވެސް ހިއްސާ ކޮށްފައެވެ.
