އިންޑިޔާގެ އޮޑިއްސާ ސްޓޭޓުގެ ބަލޮސޯރް ޑިސްޓްރިކްޓުގައި 2 ރޭލެއް މުޑި އަރައި ރޭ ހިނގި ހިތާމަވެރި ހާދިސާގައި 230 އަށްވުރެ ގިނަ މީހުން މަރުވެއްޖެއެވެ.
މިހާދިސާގައި 800 އަށްވުރެ ގިނަ މީހުންނަށް އެކިވަރުގެ އަނިޔާތައް ލިބި ދަނީ ހޮސްޕިޓަލްތަކުގައި ފަރުވާ ދެމުންނެވެ. އިންޑިޔާގެ ކަމާބެހޭ ފަރާތްތަކުން ލަފާ ކުރާ ގޮތުގައި މަރުވި މީހުންގެ އަދަދު އިތުރުވުމަކީ ވަރަށް ބޮޑަށް އެކަށީގެންވާ ކަމެވެ.
ހާދިސާގައި މީހުން ސަލާމަތް ކުރުމަށް 200 އެމްބިއުލަންސާއި 100 އެއްހައި ޑޮކްޓަރުން ހާދިސާ ހިނގި ސަރަަހައްދުގައި ދަނީ ހަރަކާތްތެރިވަމުންނެވެ.
މިހާދިސާއާ ގުޅިގެން އިންޑިޔާގެ ބޮޑުވަޒީރު ނަރެންދުރަ މޯދީ ކުރެއްވި ޓްވީޓެއްގައި ވިދާޅުވީ ހިތާމަވެރި މިދަނޑިވަޅުގައި އެމަނިކުފާނު ހުންނެވީ ހިތްދަތިކަން ލިބުނު އާއިލާތަކާ އެކުގައިކަމަށާއި އަނިޔާ ލިބުނު ފަރާތްތަކަށް އަވަސް ޝިފާއެއް ލިބުމަށް އެދޭ ކަމަށެވެ.
ދެރޭލެއް މުޑި އަރައި ހިނގި މިހާދިސާއަކީ ފާއިތުވެދިޔަ 10 ވަރަކަށް އަހަރު ތެރޭގައި އިންޑިޔާގައި ހިނގި މިފަދަ އެންމެ ހިތާމަވެރި ހާދިސާކަމަށް އެގައުމުގެ މީޑީޔާތަކުން ދަނީ ބުނަމުންނެވެ.
