(ނިއު އިންގްލެންޑް): އެމެރިކާގެ ނިއުއިންގްލެންޑުގެ އަވަށެއް ކަމުގައިވާ މެއިންގެ އައްސޭރި ފަށުގައި މަސްވެރިކަމަށް ނިކުޅެ އުޅުނު ގްރޫޕަކުން ވަރަށް މަދުން ނޫނީ ނުފެންނަ އަލްޓްރާ ރެއާ އޮރެންޖް ލޮބްސްޓަރއެއް (އިއްސެއް) ހިފައިފިއެވެ.
ކެޕްޓަން ގްރެގް ޓަރނަރ އާއި އޭނާގެ ފަޅުވެރިން ކަމަށްވާ ސޭޖް ބްލޭކް އާއި މެންޑީ ސައިރ ލޮބްސްޓަރ ބާނާފައިވަނީ ޑެބޮރާ އާއި މެގަން ދޯނީގައި މަސްވެރިކަން ކުރަމުން ދަނިކޮށެވެ. މިގްރޫޕުން މިހާރު ނިންމާފައި ވަނީ މި އިހި ޔުނިވާސިޓީ އޮފް ނިއު އިންގްލެންޑަށް އެ ކްރަސްޓޭޝިއަން ހަދިޔާ ކުރުމަށެވެ.
"މިއީ އަހަންނަށް މިކަހަލަ އިއްސެއް ފެނުނު ފުރަތަމަ ފަހަރު. އެކަމަކު ކެޕްޓަން ގްރެގް އަށް މިފަދަ އިއްސެއް ފެނުނު މިއީ ދެވަނަ ފަހަރު،" ޕޯޓްލެންޑް ޕްރެސް-ހެރަލްޑް އަށް ދިން އިންޓަވިއުއެއްގައި އިހި ހިފި ގްރޫޕުގައި ހިމެނުނު ސައިރް ބުންޏެވެ.
ސައިންސްވެރިން ލަފާ ކުރާ ގޮތުގައި އޮރެންޖް އިއްސެއް އުފަން ވަނީ ކޮންމެ 30 މިލިޔަން އިއްސަކުން އެއްފަހަރުއެވެ. މިއީ ނޫކަލައިގެ އިހި އުފަންވާ މިންވަރަށްވުރެ މަދު މިންވަރެއްކަން ސައިންސްވެރިން ފާހަގަ ކުރެއެވެ
މި އިހި ދިރާސާ ކުރާ ޓީމުގައި ހިމެނޭ ސައިންސްވެރިން ބުނާ ގޮތުގައި އިހީގެ ނިޔަފަތި ގެއްލިފައިވާ ކަމަށާއި، ނިޔަފަތި އަނބުރާ ބޮޑުވާ ގޮތް ދިރާސާ ކުރުމުން، އޮރެންޖު ކުލައިގެ އިހި އުފަންވުމުގެ އަސްލާ ބެހޭ ގޮތުން ބައެއް ޖަވާބުތައް ލިބިދާނެ ކަމަށެވެ.
"ދިރާސާއިން އަޅުގަނޑުމެންނަށް ޖަވާބު ލިބިގެންދާނެ އޮރެންޖް ކުލައިގެ އިހި އުފަންވަނީ ޖެނެޓިކުގެ ސަބަބުންތޯ ނުވަތަ އިހި އުފަންވާ މާހައުލުގެ ސަބަބުންތޯ" ސްކޫލް އޮފް މެރިން އެންޑް އެންވަޔަރަންމަންޓަލް ޕްރޮގްރާމްސްގެ އެކަޑަމިކް ޑިރެކްޓަރު ޗާލްސް ޓިލްބާގް ވިދާޅުވިއެވެ.
