މިދިޔަ މަހުގައި ރާއްޖޭގައި ހަށި ވިއްކުމުގެ ނެޓްވޯކް ފުޅާ ދާއިރާގައި ހިންގާކަމަށް ތުހުމަތުކޮށް ހައްޔަރުކުރި ބިދޭސީ މީހާގެ ބަންދަށް އިތުރު 15 ދުވަސް ޖަހައިފިއެވެ. ހަށި ވިއްކުމުގެ މައްސަލާގައި ހައްޔަރުކޮށްފައިވަނީ އެމްޑީ ފައިޒުލް އިސްމާއިލް ކިޔާ 33 އަހަރުގެ ބަންގްލަދޭޝް ފިރިހެނެކެވެ.
ކޯޓު އަމުރުގައި ފުލުހުންނާ ހަވާލާދީ ބުނެފައިވާ ގޮތުގައި، އެ މައްސަލައިގައި ބަޔާން ނެގި މީހުންގެ ފަރާތުން، އެނގިފައިވާ ގޮތުގައި އޭނާއަކީ އެ ނެޓްވޯކްގެ އިސް ފަރާތެކެވެ. އަދި ތުހުމަތު ކުރެވޭ ފަރާތްތަކުގެ ފޯނުން އޭނާއާ މުއާމަލާތް ކޮށްފައިވާ ކަމަށްވެސް ފުލުހުން ބުނެފައިވެއެވެ.
މިމީހާގެ މައްސަލާގައި އިތުރު 15 ދުވަސް ޖަހާފައިވަނީ އޭނާއަކީ ބަންގްލަދޭޝް މީހަކަށްވުމުން، ފިލައިގެން ދިއުމުގެ ފުރުސަތުބޮޑުކަމަށްވާތީއެވެ. އަދިހަމައެއާއެކު މައްސަަލައިގައި ހެކިބަސް ދޭން ތިބި މީހުންނަށް އޭނާ ނުފޫޒު ފޯރުވުމުގެ ފުރުސަތު އޮތުމާއި މީނާއަކީ ނެޓްވޯކްގެ ބޮޑެއް ކަމަށް ތުހުމަތު ކުރެވޭތީއެވެ.
ހަށިވިއްކުމުގެ މައްސަލަތައް ދުވަހަކަށްވުރެ ދުވަހެއް ދަނީ ގިނަވަމުންނެވެ. އެކަން ހުއްޓުވުމުގެ ގޮތުން މިދިޔަ މަހުގައި ވަނީ ހާއްސަ އޮޕަރޭޝަންއެއް ހިންގާ 14 މީހުން ހައްޔަރުކޮށްފައެވެ.
