އެމެރިކާގެ ގައުމީ ސަލާމަތާ ގުޅޭ ލިޔުންތަކެއް ފްލޮރިޑާގައި ހުންނަ އަމިއްލަ ގޭގައި ބެހެއްޓެވި މައްސަލައިގެ އަޑު އެހުމަށް ކުރީގެ ރައީސް ޑޮނަލްޑް ޓްރަމްޕް ރޭ ކޯޓަށް ހާޒިރު ކޮށްފިއެވެ.
ފްލޮރިޑާގެ މިއާމީ ފެޑެރަލް ކޯޓުން ޓްރަމްޕުގެ މައްޗަށް ކޮށްފައިވާ ދައުވާތަކުގެ ތެރޭގައި "އެމެރިކާގެ ނިއުކްލިއާ ހަތިޔާރު" އާއި "ބިދޭސީ ގައުމެއްގެ ނިއުކްލިއާ ކެޕޭސިޓީ" އާއި ގުޅުން ހުރި ލިޔެކިޔުންތަކާއި ވައިޓް ހައުސްގެ ޖާސޫސީ ބްރީފިންތަކުން ލިބުނު ލިޔެކިޔުންތަކާއި އެމެރިކާ އާއި އެހެން ގައުމުތަކުގެ އަސްކަރީ ގާބިލްކަން ތަފްސީލުކޮށް ލިޔެފައިވާ ބައެއް ލިޔެކިޔުންތައް ހުއްދަ ނެތި އަމިއްލަ ގޭގައި ބެހެއްޓެވި މައްސަލަ އާއި އެމެރިކާގެ ގައުމީ ދިފާއީ މައުލޫމާތު ގަސްދުގައި ހިފެހެއްޓެވި މައްސަލަ ހިމެނެއެވެ.
މީގެ އިތުރުން އިންސާފަށް ހުރަސް އެޅުމާއި ދޮގު ބަޔާން ދިނުމުގެ ދައުވާގެ އިތުރުން އެހެނިހެން ކުށްތައް ވެސް ހިމެނެ އެވެ. ޓްރަމްޕުގެ މައްޗަށް ޖާސޫސީ ގާނޫނުގެގެ ދަށުން 31 ދައުވާއެއް މިއާމީ ފެޑެރަލް ކޯޓުން ރޭ އުފުލިއެވެ. އަދި އެހެނިހެން ޤާނޫނުތަކުގެ ދަށުން 6 މައްސަލައެއް ޓްރަމްޕާ ދެކޮޅަށް ވަނީ އުފުލާފައެވެ.
ކޯޓުން ޓްރަމްޕުގެ މައްޗަށް އުފުލާފައިވާ ހުރިހާ ދައުވާތަކަށް ޓްރަމްޕް ވަނީ އިންކާރު ކުރައްވާފައެވެ. ޓްރަމްޕް ވިދާޅުވީ މިއީ ކުރިއަށް އޮތް 2024 ވަނަ އަހަރު އެމެރިކާގައި ބޭއްވުމަށް ހަމަޖެހިފައިވާ ރިޔާސީ އިންތިހާބުގައި އެމަނިކުފާނު ވާދަކުރައްވާނެކަން ޔަގީން ކުރެވޭތީ އިދިކޮޅު ފަރާތްތަކުން އޭނާއާ ދެކޮޅަށް ފަށާފައިވާ ބޭއިންސާފު ޝަރީއަތެއް ކަމަށެވެ.
ޝަރީއަތަށް ޓްރަމްޕް ރޭ ކޯޓަށް ހާޒިރު ކުރެއްވުމާއެކު ޓްރަމްޕް ވެވަޑައިގެންފައި ވަނީ އެމެރިކާގެ ތާރިހުގައި ކޯޓަށް ހާޒިރު ކުރެއްވި އެމެރިކާގެ ފުރަތަމަ ރައީސަށެވެ. ޓްރަމްޕުގެ މައްޗަށް އުފުލާފައިވާ ދައުވާތައް ސާބިތުވެއްޖެނަމަ އެމަނިކުފާނަށް 20 އަހަރުގެ ޖަލު ހުކުމަކާ ކުރިމަތިވެވަޑައިގަންނަވާނެއެވެ.
