ފާއިތުވެދިޔަ ދެދުވަހު އިންޑިޔާގެ އުއްތަރަ ޕްރަދޭޝްއަށް އާދަޔާ ޚިލާފަށް ހޫނުގަދަވުމާއި ގުޅިގެން މަދުވެގެން 34 މީހުން މަރުވެފައިވާ ކަމަށް އެގައުމުގެ ކަމާ ކުޅޭ އިދާރާތަކުން ހާމަކޮށްފިއެވެ.
މީހުން މަރުވެފައި ވަނީ އުއްތަރަ ޕްރަދޭޝްގެ ވެރިރަށް ލަކްނޯގެ ބައްލިއާ ޑިސްޓްރިކުޓުންނެވެ. ބައްލިއާ ޑިސްޓްރިކްޓުގެ ޗީފް މެޑިކަލް އޮފިސަރ ޖަޔަންތު ކުމާރު ވިދާޅުވީ 23 މީހުން މަރުވީ މިދިޔަ ބުރާސްފަތި ދުވަހު ކަމަށާއި އަނެއް 11 މީހުން މަރުވީ ހުކުރު ދުވަހު ކަމަށެވެ. މަރުވި މީހުންގެ ތެރޭގައި މުޅިންވެސް ތިބީ އެކިބަލިތަކުގައި އެނދުމަތިކޮށްގެން ފަރުވާ ދެމުން އަންނަ 60 އަހަރުން މަތީގެ މީހުންނެވެ.
އޭޕީ ނިއުސް އެޖެންސީއަށް ދެއްވި ބަސްދީގަތުމެއްގައި ޖަޔަންތު ވިދާޅުވީ މީހުން މަރުވީ ހޫނުގަދުވުމާއި ގުޅިގެން ކުރިމަތިވި ހާޓް އެޓޭކްތަކާއި ބްރެއިން ސްޓްރޯކާއި ހަށިގަނޑުން ފެން ހުސްވެގެން ކަމަށެވެ.
އިންޑިއާ މީޓިއޮރޮލޮޖިކަލް ޑިޕާޓްމަންޓުގެ ތަފާސް ހިސާބުތަކުން ދައްކާ ގޮތުގައި ހުކުރު ދުވަހު ބާލިއާގެ ހޫނުމިން ހުރީ 42.2 ޑިގްރީ ސެލްސިއަސް (108 ޑިގްރީ ފަރެންހައިޓް) ގައެވެ. އެއީ އެސަރަހައްދުގެ އާންމު ފިނިހޫނުމިނަށް ވުރެ 4.7 ސެލްސިއަސް މަތި އަދަދެކެވެ.
އުއްތަރު ޕްރަދޭޝްގެ ޗީފް މިނިސްޓަރު ވެރިކަން ކުރާ ބީޖޭޕީގެ ޔޯގީ އަދީއްޔާނާތު ވަނީ އެ ސްޓޭޓުގައި މެދުކެނޑުމެއްނެތި ކަރަންޓް ފޯރުކޮށްދިނުމަށް ސަރުކާރުން އަޅަންޖެހޭ ހުރިހާ ފިޔަވަޅެއް އަޅަމުންދާ ކަމުގެ ޔަގީންކަން އާންމުންނަށް ދެއްވާފަ އެވެ. އަދި ރައްޔިތުންނަށް ސަރުކާރަށް އެއްބާރުލުންދީ، ކަރަންޓް ވިސްނުންތެރިކަމާއެކު ބޭނުންކުރުމަށް އެމަނިކުފާނު އިލްތިމާސް ކުރެއްވިއެވެ.
