މަޝްހޫރު ޓައިޓޭނިކް ފެތިފައި އޮތް ސަރަހައްދަށް ގެއްލިގެން ހޯދުމަށް އަންނަ އޯޝަންގޭޓުގެ "ޓައިޓަން"ގެ ނަން ދީފައިވާ ސަބްމެރިންގެ އަޑުކަމަށް ބެލެވޭ އަޑުތަކެއް މަސައްކަތުގައި ހަރަކާތްތެރިވާ ކެނަޑާގެ ސަވައިލަންސް މަތިންދާބޯޓަކަށް ފާހަގަ ކުރެވުމުން، ޓައިޓަން ފެނިދާނެ ކަމުގެ އުއްމީދު އާވެއްޖެއެވެ.
އެމެރިކާގެ ކޯސްޓްގާޑާއި ހަވާލާދީ، ބީބީސީއިން ބުނެފައި ވަނީ ކެނަޑާގެ ޕީ-3 މެރިޓައިމް ސަވައިލެންސް މަތިންދާބޯޓުން ފާހަގަކުރި އަޑުތަކުގެ އަސްލު ހޯދުމަށް ތަހްލީލް ކުރުމުގެ މަސައްކަތް ކުރަމުން އަންނަ ކަމަށެވެ. ސަވައިލެންސް މަތިންދާބޯޓަށް ކަނޑުގެ އަޑިން ފާހަގަ ކުރެވިފައި ވަނީ "ޓައިޓަން" ގެއްލުނު ކަމަށް ބުނާ ސަރަހައްދުން ކޮންމެ 30 މިނެޓަކުން އަޑެއް އިވެމުން އަންނަ ކަމަށެވެ.
"ޕީ-3 މަތިންދާބޯޓުގެ ޑޭޓާ އަޅުގަނޑުމެން ވާނީ އެމެރިކާގެ ނޭވީގެ ތަޖުރިބާކާރުންނާ ހިއްސާކޮށްފައި އިތުރަށް ތަހުލީލު ކުރުމަށާއި އެކަން ކުރިއަށް އޮތް ސަރޗް ޕްލޭންތަކުގައި ބޭނުން ކުރުމަށް" ޕީ-3 މަތިންދާބޯޓު އޮޕަރޭޓް ކުރާ ކުންފުނިން ކުރި ޓްވީޓެއްގައި ބުނެފައިވެއެވެ.
ގެއްލިފައިވާ "ޓައިޓަން" އިން ދަތުރު ކުރި މީހުންގެ ތެރޭގައި އިނގިރޭސިވިލާތުގެ ބިލިޔަރު ހެމިޝް ހާޑިން ހިމެނެއެވެ. މީގެ އިތުރުން އިތުރު 4 މީހަކު "ޓައިޓަން" ގައި ދަތުރު ކުރިއެވެ. "ޓައިޓަން" އިން މައިގަނޑު ގޮތެއްގައި ޓައިޓޭނިކް ފެތިފައިވާ ސަރަހައްދުގެ ކަނޑުގެ އަޑިއަށް ދަތުރު ކޮށްދެނީ 250،000 ޑޮލަރަށެވެ.
އެކްސްޕްލޯރާސް ކްލަބްގެ ރައީސް ރިޗަޑް ގެރިއޮޓް ކްލަބްގެ މެންބަރުންނަށް މިއަދު ފޮނުވި ސިޓީއެއްގައި ބުނީ ސަބްމެރިންގައި ތިބި މީހުން ދިރިތިއްބާ ހޯދޭނެ ކަމުގެ އުއްމީދު އެބައޮތް ކަމަށެވެ. "ލިބިފައި ހުރި ޑޭޓާތަކަށް ބަލާއިރު އެމީހުން ދިރިތިއްބާ ފެންނާނެ ކަމުގެ އުއްމީދު އެބައޮތް" ރިޗަޑްގެ ސިޓީގައި ބުންޏެވެ.
ރެސްކިއު ޓީމުން ބުނެފައި ވަނީ "ޓައިޓަން" ގައި މިހާރު އޮކްސިޖަން ހުންނާނެ ކަމަށް ބެލެވެނީ 30 ގަޑިއިރަށް ބޭނުންވާ މިންވަރަށެވެ. އެހެން ކަމުން "ޓައިޓަން" އިން ދަތުރު ކުރި 5 މީހުން ދިރިިތިއްބާ ހޯދުމަށް ކުރިއަށް އޮތް އޮތީ ނޭވާ ހިފަހައްޓާލަން ޖެހޭފަދަ 30 ގަޑިއިރެވެ.
