ފްރާންސްގެ ވެރިރަށް ޕެރިހާއި އެހެނިހެން ސިޓީތަކުގައި އާންމުން ނިކުމެ ހިންގަމުން އަންނަ ހަމަނުޖެހުންތައް ހުއްޓާލުމަށް އެގައުމުގެ ފުޓްބޯޅަ ތަރި ކިލިއަން އެމްބައްޕޭ އާއި ގައުމީ ފުޓްބޯޅަ ޓީމުން މިއަދު ގޮވާލައިފިއެވެ.
މީގެ ހަތަރު ރޭ ކުރިން ފެށިގެން އާންމުން ނިކުމެ ޕެރިހުގައި ހަމަނުޖެހުންތައް ހިންގަން ފެށީ، ފުލުހުން ބަޑިން ހަމަލާދީ 17 އަހަރުގެ ޒުވާނަކު މަރާލުމުންނެވެ. ފްރާންސް ފުލުހުން މަރާލި ޒުވާނާ، ނަހެލްއަކީ އަލްޖީރިއާއިން ފްރާންސަށް ހިޖުރަ ކޮށްފައިވާ އަންހެނެއްގެ ހުރި ހަމައެކަނި ދަރިކަމަށް އަލްޖަޒީރާއިން ބުނެއެވެ.
އެމްބައްޕޭ އޭނާގެ ފޭސްބުކް ޕޭޖުގައި ކުރި ޕޯސްޓެއްގައި ބުނީ އަނިޔާވެރިކަމަށް ވަގުތު ދިނުމުގެ ބަދަލުގައި ވަގުތު ދޭންވީ މަޝްވަރާ އާއި ސުލްހައަށް ކަމަށެވެ.
"އަމިއްލަ އަތުން ތިޔަ ހަލާކު ކޮށްލެވެނީ އަމިއްލަ ތަކެތި. އަމިއްލައަށް ބިނާ ކޮށްފައިވާ ތަކެތި. ރީތި އަވަށްތަކާއި ހިތްފަސޭހަކަން ގެނުވާ ތަންތަނަށް ގެއްލުން ދިނުމަކުން ހަމަޖެހުމެއް ނާންނާނެ. ހަމަޖެހުން ގެނައުމަށްޓަކައި މަޝްވަރާއަށް އިސްކަން ދިނުމަށް ގޮވާލަން" ފްރާންސް ގައުމީ ޓީމުން ނެރެފައިވާ ބަޔާނުގައި ބުނެފައިވެއެވެ.
ފްރާންސްގް ރަގްބީ ލީގުގަޔާއި ޕިއްޒާ ޑެލިވަރީ ޚިދުމަތްދޭ ތަނެއްގައި މަސައްކަތް ކުރާ ނަހެލްގެ މަރާ ގުޅިގެން ހިންގަމުން އަންނަ ހަމަނުޖެހުންތަކުގައި ކާރުތަކާއި ރެސްޓޯރަންޓްތަކުގައި އާންމުން ގެންދަނީ ހުޅުޖަހަމުންނެވެ. އަދި މަގުތައް މަތީގައި ޓަޔަރުތައް ބަހައްޓައި އޭގައި ހުޅުޖަހަމުންވެސް ގެންދެއެވެ.
ހަމަނުޖެހުންތަކުގައި ފްރާންސް ފުލުހުން މިހާތަނަށް 667 މީހުން ހައްޔަރު ކޮށްފައިވާކަމަށް ފްރާންސް މީޑިޔާ ރިޕޯޓުތައް ބުނެއެވެ. އަދި ސަލާމަތީ ކަންކަން ބެލެހެއްޓުމަށް 40،000 ފުލުހުން މަގުމައްޗަށް ވަނީ ނެރެފައެވެ.
