މިނިވަންދުވަހުގެ މުނާސަބަތުގައި ހޯމް މިނިސްޓްރީއާއި އާބަންކޯ ގުޅިގެން ހުޅުމާލޭ ސެންޓްރަލް ޕާކުގައި ކުރިއަށް ގެންދާ “މިނިވަން އުފާ ކާނިވާ“ މިރޭ ހުޅުވައިފިއެވެ. މިނިވަން އުފާ ކާނިވާ ހުޅުވައިދެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހެވެ.
ކާނިވާ ހުޅުވުމަށް މިރޭ ބޭއްވި ރަސްމިއްޔާތުގައި ރައީސްގެ އަނބިކަނބަލުން ފަޒްނާ އަހުމަދާއި ދައުލަތުގެ ވަޒީރުންނާއި އާބަންކޯގެ އިސް ވެރިން ވަނީ ބައިވެރިވެވަޑައިގަންނަވާފައެވެ. ކާނިވާ ހުޅުއްވައި ދެއްވުމަށްފަހު ރައީސް ވަނީ ކާނިވަލުގައި ގާއިމްކޮށްފައިވާ އެކި ސްޓޯލް ތަކަށް ޒިޔާރަތް ކުރަށްވައި އެތަންތަން ބައްލަވާލައްވާފައެވެ.
މި ކާނިވާ ކުރިއަށްދާނީ އޮގަސްޓް ތިންވަނަ ދުވަހުގެ ނިޔަލަށެވެ.
މި ކާނިވަލުގައި އާންމުންނަށް ބައިވެރި ވެވޭނެ ގިނަ ހަރަކާތްތަކެއް ކުރިއަށް ގެންދާގޮތަށް ވަނީ ހަމަޖެހިފައެވެ.
އެގޮތުން ކާނިވަލްގައި ގޭމް ސްޓޯލްތައް، ބިރުވެރި ހޮހަޅަ، ކާބޯތަކެތި ވިއްކުމަށް ހާއްސަ ފުޑް ސްޓްރީޓް، ފްލޯޓްތައް ދައްކާލުން، ބޭރުގެ ހުނަރުވެރިންނާ އެކު ސާކަސް ޝޯ، ލައިވް މިއުޒިކް، ކަރޯކޭ ބޮކްސް ކުރިއަށް ގެންދާނެ ކަމަށް އެހަރަކާތް އިންތިޒާމްކުރި ހޯމް މިނިސްޓްރީ އާއި އާބަންކޯ އިން މައުލޫމާތުދެެއެވެ.
އަދި މިރޭ 09:30 ގައި 08 މިނެޓަށް ހަވާ އަރުވާ ގޮތަށްވެސް ވަނީ ހަމަޖެހިފައެވެ.
ރޭ ހުޅުވާ ގޮތަށް ހަމަޖައްސާފައި އޮތް ނަމަވެސް މާލެސަރަހައްދުގައި ބޭރަށް ހިންގުމާއި ހޮޑުލުމުގެ ރޯގާއެއް ފެތުރެމުން ދާތީ މިކާނިވާ ހުޅުވުން ވަނީ ކެންސަލް ކޮށްފައެވެ އަދި މިރޭ މިވަނީ ކާނިވާ ހުޅުވާފައެވެ.
މާލެ ސަރަހައްދުގައި މިހާރު ފެތުރެމުންދަނީ ނޯރޯވައިރަސްގެ ރޯގާ ކަމަށާއި މިއީ ހަލުވިކަމާއެކު ފެތުރޭ ވައިރަސްއެއް ކަމަށް އެޗްޕީއޭއިން ވަނީ ބުނެފައެވެ.
ގިނަ މީހުން އެއްވެ ތިބޭ ތަންތަނުގައި މި ވައިރަސް ވަރަށް ފަސޭހައިން ފެތުރޭ ކަމަށް ވެސް އެޗްޕީއޭ އިން ބުނެފައިވެއެވެ. އަދި މިރޭ ކާނިވާ ހުޅުވާ ރަސްމިއްޔާތަށް އަދި ކާނިވަލަށް ޒިޔާރަތް ކުރާ މީހުންގެ ސަމާލުކަމަށް، މިރޯގާގެ އެއްވެސް އަލާމާތެއް ހުރި ފަރާތެއްނަމަ މިތަނަށް ނުދިއުމަށް އާބަންކޯއިންވެސް ވަނީ އިލްތިމާސްކޮށްފައެވެ.
އަދި ހަމަ އެހެންމެ އެޗްޕީއޭ އިން ވެސް ވަނީ ރައްކާތެރިކަމުގެ ފިޔަވަޅުތައް އެެޅުމަށް ގޮވާލާފައެވެ.
