އިލެކްޝަންސް ކޮމިޝަންގެ ރައީސް ފުވާދު ތައުފީޤްގެ ދަރިކަލުން، އަޙްމަދު ފުއާދު ނިޔާވުމާއި ގުޅިގެން ޖަނާޒާގައި ބައިވެރިވުމަށް ފުއާދު ވަޑައިގެންފިއެވެ.
އަޙްމަދު ނިޔާވީ އިންޑިއާގެ ޓްރިވެންޑްރަމްގެ ކިމްސް ހޮސްޕިޓަލްގައި ފަރުވާދެމުން އަންނަނިކޮށް މިއަދު ހެނދުނުގެ ވަގުތެއްގައެވެ. އަހުމަދު ނިޔާވީއިރު އުމުރަކީ 47 އަހަރެވެ. އަދި ފުރަމޭގެ ބައްޔެއްގައި ފަރުވާ ހޯދަމުން ފުވާދު އަންނަތާ ވަނީ ދުވަސްތަކެއް ވެފައެވެ. ނަމަވެސް އޭނާ ނިޔާވި ކާޑިއެކް އެރެސްޓެއްގައެވެ.
ފުއާދުވަނީ އިންޑިއާގައި އަހުމަދަށް ފަރުވާ ދެމުންދިޔައިރު އިންޑިއާގައި ގިނަ ދުވަސްތަކެއް ވަންދެން ހުންނަވައި ދަރުފުޅާއިއެކު ގިނަ ވަގުތު ހޭދަ ކުރައްވާފައެވެ.
ދަރިކަލުން ނިޔާވެފައިވާއިރު މިއަދަކީ މިއަހަރުގެ ރިޔާސީ އިންތިހާބަށް ކެންޑިޑޭޓުންގެ ފޯމް ހުށައަޅުއްވަންޖެހޭ ފަހު ދުވަސް ކަމަށް ވާތީ ފުއާދު ހުންނެވީ މާލޭގައެވެ. މިފަދަ ނާޒުކު ދަނޑިވަޅެއްގައިވެސް ފުއާދު ގައުމާއި ދައުލަތުގެ ހިދުމަތުގައި ޒިންމާ އަދާކުރެއްވުމުގައި އެދެއްކެވީ ގަދަފަދަ ވަރުގަދަ ނަމޫނާއެކެވެ. މިއީ ޔަގީނުންވެސް ފުއާދުގެ ހިތްޕުޅަށް ދަތި، ހިތާމަވެރި ވަގުތެކެވެ. އެހެންނަމަވެސް ފުއާދު ދައްކަވަމުން އެގެންދަވަނީ ކެތްތެރިކަމާއި ޒިންމާދާރުކަމުގެ އެންމެ ރިވެތި ފުރިހަމަ މިސާލެކެވެ.
ފުއާދުގެ ދަރިފުޅު އަހުމަދުގެ ފުރާނަފުޅަށް ސުވަރުގޭގެ މަތިވެރި ނިއުމަތް މިންވަރުކުރައްވައި، ޢާއިލާއަށް ކެތްތެރިކަން ދެއްވުން އެދި ދުޢާކުރަމެވެ.
