އދގެ 75 ވަނަ އަހަރީ ދުވަހު އިންޑިއާގެ ބޮޑު ވަޒީރު ނަރެންދްރަ މޮދީގެ ތަގްރީރު ފެށްޓެވީ 1.3 ބިލިއަން މީހުންގެ ފަރާތުން ހެޔޮ އެދުން ރައްދު ކުރައްވަމުންނެވެ. މޮދީގެ ތަގްރީރުގައި އިންޑިއާގެ ހަޟާރަތާއި އިންޑިއާއިން ދުނިޔެއަށާއި އދއަށް ވެދޭ ހިއްސާއާއި އދގެ މެންބަރެއްގެ ހައިސއްޔަތުން އިންޑިއާގެ ރައްޔިތުން އދން ކުރާ އުންމީދުގެ މައްޗަށް އަލި އަޅުވާލެއްވިއެވެ.
ކުރު އެހެން ނަމަވެސް މެސެޖްތަކުން ފުރިފައިވާ މި ސްޕީޗްގައި އޭނާ ވަނީ އދ އިސްލާޙުކުރުމަށާއި އޭނާގެ ގައުމުގެ ތަސައްވުރު ދުނިޔެއަށް ހުށަޅާފައެވެ.
އިންޑިއާގެ މައިގަނޑު އެދުމަކީ އދ އިސްލާހު ކުރުމެވެ. އަދި ދުނިޔޭގެ ބޮޑެތި ބާރުތަކާ އެއްފަދައިން އަދި އާބާދީގެ ގޮތުން ދެވަނަ ގައުމަށް ވެފައި ދުނިޔޭގެ އެންމެ ބޮޑު ޑިމޮކްރެސީގެ ހައިސިއްޔަތުން އިންޑިއާއަށް އދގައި ކަންކަން ނިންމުމުގައި ހައްގު މަގާމު ލިބުމެވެ. އެއީ ސަލާމަތީ މަޖިލީހުގައި އިންޑިއާއަށް ދާއިމީ ގޮނޑިއެއް ލިބުމެވެ.
މޮދީގެ ތަގްރީރުގެ އުސްއަލިތަކަކީ މުސްތަގްބަލަށް ކަންކަން ދިރާސާ ކުރާފަރާތްތަކަށް މުހިންމު ތަގްރީރެކެވެ.
މީގައި އެންމެ ފާހަގަ ކުރެވޭ ކަމަކީ އިންޑިއާގެ މެސެޖް ގެނެސްދީފައިވަނީ އެއްވެސް ގައުމަކަށް އިޝާރާތެއް ކުރެއްވުނެއް ނެތި އަދި އެއްވެސް ގައުމަކާ މެދު ޝަކުވާއެއް ކުރެއްވުމެއް ނެތިއެވެ.
އުސްއަލިތައް:
އިންޑިއާއަކީ އދގެ މުއައްސިސް މެންބަރުންގެ ތެރޭން މެންބަރެއް.
މިއަދު މިތަނަށް މިހުއްޓުނީ އިންޑިއާގެ 1.3 ބިލިއަން މީހުންގެ ޝުއޫރުތައް ހިއްސާ ކޮށްލުމަށް.
މިއަދު 21 ވަނަ ގަރުނުގައި ދިމާވެފައިވާ ގޮންޖެހުންތަކާއި މުސްތަގްބަލަށް ތައްޔާރުވާން ކުރަން ޖެހޭ ކަންތައްތަކަކީ އދ އުފެއްދި އިރު ކުރަން ޖެހުނު ކަންތައްތަކެއް ނޫން.
އދގެ 75 އަހަރަށް ބަލާއިރު އެތަކެއް ކާމީޔާބީއެއް ފެނޭ.
ތިންވަނަ ބޮޑު ހަނގުރާމައެއް ފެއްޓިޔަ ނުދީ ހުއްޓުވިފައިވޭ. އެހެން ނަމަވެސް ކުދި ހަނގުރާމަތަކާއި އެތަކެއް އަހުލީ ހަނގުރާމައެއް ވަނީ ހިނގާފަ.
އެތަކެއް ޓެރަރިސްޓް ހަމަލާއެއް ވަނީ ދެވިފައި. އެތަކެއް މީހުން ބިކަވެ، ރެފިއުޖީންނަށް ވެފައިވޭ.
މި ހާލަތުގައިވެސް އދގެ މަސައްކަތް ފުދޭތޯ؟
މިއަދު ދުނިޔެއިން ދަނީ ވަބާއަކާ ހަނގުރާމނަ ކުރަމުން.
އަށް ނުވަ މަސްވަންދެން ކުރަމުންދާ މިހަނގުރާމައިގައި އދ ކޮބައި ތޯ؟
އދން ކަންކަމާ ކުރިމަތިލާ ގޮތާއި އދން ކަންކަން ނިންމާ ގޮތާއި އދގެ ޗާޓަރު އިސްލާހު ކުރުމަކީ މިވަގުތަށް އެންމެ ބޮޑަށް ބޭނުންވެފައިވާ ކަން.
އިންޑިއާގައި އދ ޖަމުއިއްޔާއަށް ނުހަނު ބޮޑު އިހުތިރާމެއް ދެވިފައިވޭ.
އދ އިސްލާހު ކުރުމުގެ މަސައްކަތަކީ އިންޑިއާގެ ރައްޔިތުން ވަރަށް ގިނަ ދުވަސްވަންދެން ކުރަމުންދާ އިންތިޒާރެއް.
މިއަދު އިންޑިއާ ރައްޔިތުންގެ ސުއާލަކީ މި އިސްލާހެއް އަންނާނެ ބާވައޭ؟
އދގެ ކަންކަން ނިންމުމުގެ އޮނިގަނޑުގެ ބޭރުގައި އިންޑިއާ ބާއްވަނީ ކިހާ ދުވަހެއް ވަންދެން ތޯ؟
އިންޑިއާއަކީ، ދުނިޔޭގެ އެންމެ ބޮޑު ޑިމޮކްރެސީ.
އިންޑިއާއަކީ، ދުނިޔޭގެ 18 އިންސައްތަ މީހުން.
އެއީ، އެތައް ސަތޭކަ ބަހަކާއި، އެތައް ސަތޭކަ ބަހުރުވައެއް ހިމެނޭ ގައުމު.
އެތައް ދީނަކާއި އެތައް ފިކުރެއް ހިމެނޭ ގައުމު.
އެތައް ސަތޭކަ އަހަރެއް ވަންދެން ދުނިޔޭގެ އިގްތިސާދު ކުރިއަށް ގެންގޮސްދިން ގައުމު.
ހަމައެފަދައިން ބިދޭސި ވެރިކަމެއް އެތައް ސަތޭކަ އަހަރު ވަންދެން ހިންގި ގައުމުވެސް މެ.
އަޅުގަނޑުމެން ބާރުގަދަކޮށް ތިބި ދުވަސްވަރު، އަޅުގަނޑުމެން ދުނިޔެއަކަށް އުނދަގުލެއް ނުޖައްސަން.
އަޅުގަނޑުމެން ބަލިކަށިކޮށް ތިބި އިރުވެސް އަޅުގަނޑުމެން ދުނިޔެއަކަށް ބުރަޔަކަށް ނުވަން.
އަޅުގަނޑުމެން އަދިވެސް މަޑުކޮށްގެން ތިބެންވީ ކިތައް ކިހާ ދުވަހަކަށް ތޯ؟ އަޅުގަނޑުމެންގެ ގައުމުގައި ހިނގާ ކަންކަމަކީ އެއިން މުޅި ދުނިޔެއަށް އަސަރުކުރާ ކަންކަން.
އދ ވުޖޫދަށް އައި ވިސްނުންތަކަކީ އިންޑިއާގެ ވިސްނުން.
އދގެ ފަލްސަފާއަކީ، އިންޑިއާގެ އަސާސީ ފަލްސަފާއާ ތަފާތު ފަލްސަފާއެއް ނޫން.
މުޅި ދުނިޔެއަކީ އާއިލާއެއް. މި ވާހަކަ ވަނީ އދގެ ހޯލުގައި އެތައް ފަހަރަކު އެކޯވެފައި.
އަޅުގަނޑުމެން މުޅި ދުނިޔެ ދެކެނީ އަޅުގަނޑުމެންގެ ސަގާފަތާއި ގޮތްތަކާއި ވިސްނުން ހިއްސާކުރާ އެއް އާއިލާއެއްގެ ގޮތުގައި.
އިންޑިއާއަކީ އެގައުމުގެ ސިފައިން ސުލްހަ ބެލެހެއްޓުމަށްޓަކައި 50 ގައުމަކަށް ފޮނުވާ ގައުމެއް. އިންޑިއާއަކީ ސުލްހަ ގާއިމް ކުރުމުގައި އެގައުމުގެ އެތައް ސިފައިންގެ ފުރާނަ ގެއްލިގެން ގޮސްފައިވާ ގައުމެއް.
މިއަދު ކޮންމެ އިންޑިއާ މީހަކުވެސް ދެކެން ބޭނުންވަނީ އދގައި އިންޑިއާގެ ދައުރު ފުޅާވެފައިވާ ތަން.
އޮކްޓޯބަރ 2 ގައި އިންޓަރނޭޝަނަލް ޑޭ އޮފް ނޮން ވައެލެންސް ފެށްޓީ އިންޑިއާއިން.
21 ޖޫން ގައި އިންޓަރނޭޝަލް ޑޭ އޮފް ޔޯގާ ފެށްޓީ އިންޑިއާއިން.
ސަރަހައްދުގެ އެންމެނަށް ރައްކާތެރިކަމާއި ތިޔާގިކަން ގެނެސްދޭ ވިސްނުމުގައި އަވަށްޓެރިންނަށް އިސްކަން ދޭ ޕޮލިސިއާއި، އިރުމައްޗަށް ސަމާލުކަން ދިނުން އައިސްފައިވަނީ މި ފަލްސަފާތަކުން.
އިންޑިއާއިން އެއް ގައުމަކަށް ދިއްކޮށްލާ ރަހުމަތްތެރިކަމުގެ އަތަކީ އަނެއް ގައުމާދެކޮޅު ވުމެއް ނޫން.
އިންޑިއާއިން ތަރައްގީގައި ބައިވެރިވުމަކީ ނުބައި ނިޔަތެއްގައި ކުރާކަމެއް ނޫން.
އެއީ އެގައުމެއް ނުކުޅައްދައި ބަރޯސާ ކުރުވުމަށް ކުރާކަމެއްވެސް ނޫން.
އަޅުގަނޑުމެންގެ ތަރައްގީއާއި އަޅުގަނޑުމެންގެ ތަޖުރިބާތައް ހިއްސާކުރުމުގައި އަޅުގަނޑުމެން ދުވަހަކުވެސް ފަސްޖެހިފައެއް ނުވާނެ.
މި އުދަނގޫ ދަނޑިވަޅުގައިވެސް އިންޑިއާގެ ބޭސް އުފައްދާ ދާއިރާއިން ވަނީ ދނިޔޭގެ 150 ގައުމަކަށް ބޭސް ފޮނުވާފައި.
ދުނިޔޭގެ އެންމެ ބޮޑު ވެކްސިން އުފައްދާ ގައުމުގެ ހައިސިއްޔަތުން އަޅުގަނޑު ޔަގީންކަން އަރުވަން ބޭނުންވަނީ އިންޑިއާގެ ވެކްސިން މި ވަބާއާ ކުރިމަތިލުމަށް މުޅި އިންސާނިއްޔަތަށް ދެވޭނެ ކަމަށް.
މި އަންނަ އަހަރުގެ ޖެނުއަރީން ފެށިގެން އދގެ ސަލާމަތީ މަޖިލީހުގެ ދާއިމީ ނޫން މެންބަރުކަމުގެ ގޮނޑިއެއްގައި އިންޑިއާއިން މަސްއޫލިއްޔަތު އަދާކުރާނެ.
މިކަމުގައި އިންޑިއާއަށް އިތުބާރުކުރި ހުރިހައި ގައުމަކަށް ޝުކުރު ދަންނަވަން.
އިންސާނިއްޔަތާއި އިންސަނީ ނަސްލާ ދެކޮޅުވެރިކަންކަމުގައި ވާ ޓެރަރިޒަމްއާއި، ވަގު ހަތިޔާރުގެ ވިޔަފާރި ކުރުމާއި، މަނީލޯންޑަރ ކުރުމާ ދެކޮޅަށް އދގެ ސަލާމަތީ މަޖިލީހުގައި އިނދެގެން އިންޑިއާ އަޑު އުފުލާނެ.
އިންޑިއާއިން ވަނީ މިލިއަން މީހުންގެ ދިރިއުޅުން ބަދަލުކޮށްފައި.
މިތަޖުރިބާ ދުނިޔޭގެ އެތައް ގައުމަކަށް ބޭނުން ކުރެވިދާނެ.
ހަތަރު ފަސް އަހަރު ތެރޭގައި އިންޑިއާ ވަނީ 400 މިލިއަން މީހުން ބޭންކިންގ ނިޒާމުގެ ތެރެއަށް ވައްދާފައި.
ހަތަރު ފަސް އަހަރު ތެރޭގައި 600 މިލިއަން މީހުން ހާމަތަންތަނަށް ފާޚާނާ ކުރުމުން ސަލާމަތް ކުރުމަކީ ކުޑަކަމެއް ނޫން.
ދެ ތިން އަހަރުގެ ތެރޭގައި 500 މިލިއަން މީހުންނަށް ހިލޭ ބޭސްފަރުވާ ލިއްބައި ދިނުމަކީ ފަސޭހަކަމެއް ނޫން.
އެކަންވެސް އިންޑިއާއިން ކޮށްފި.
އިންޑިއާއަކީ ޑިޖިޓަލް ޓްރާންސެކްޝަން ހިންގުމުގައި ކުރިއަރާފައިވާ ގައުމެއް.
އިންޑިއާއިން ރައްޔިތުން ބާރުވެރި ކުރަނީ އެތައް މިލިއަން މީހުންނަށް ޑިޖިޓަލް އެކްސަސް ދީގެން.
މިއަދު އިންޑިއާއިން މަސައްކަތް ކުރަމުން ދަނީ 2025އާ ހަމައަށް އިންޑިއާއަކީ ޓީބީން ސަލާމަތްވެފައިވާ ގައުމަކަށް ހެދުމުގެ މަސައްކަތް.
މިހާރު އިންޑިއާއިން މަސައްކަތް ކުރަމުން ދަނީ 150 މިލިއަން ގެއަށް ސާފު ބޯފެން ހޮޅީގެ ޒަރީއާއިން ގުޅައި ދިނުމުގެ މަސައްކަތް.
ދާދި ފަހުން އިންޑިއާއިން ވަނީ 6 ލައްކަ ގެއަށް ބްރޯޑްބޭންޑް ފައިބަރ މެދުވެރިކޮށް ގުޅައި ދީފަ.
އިންޑިއާ ދަނީ އަމިއްލަ ފުދުންތެރި ގައުމަކަށް ވުމަށް މަސައްކަތް ކުރަމުން. އަމިއްލަ ފުދުން ތެރި އިންޑިއާ ވެގެންދާނީ ދުނިޔޭގެ އިގްތިސާދު އެތައް ގުނައަށް ކުރިއަރުވައިދޭ ބާރަކަށް.
އަންހެނުންގެ އުފެއްދުންތެރިކަމާއި އަންހެނުންގެ ލީޑާރޝިޕް ތަރައްގީ ކުރުމަށް އިންޑިއާއިން ދަނީ މަސައްކަތް ކުރަމުން.
ދުނިޔޭގެ އެންމެ ބޮޑު މައިކްރޯ ފައިނޭންސް ސްކީމުން ފައދާ ވާ ބަޔަކީ އިންޑިއާގެ އަންހެނުން.
އިންޑިއާ އަކީ 26 ހަފްތާއަށް ވިހޭ މައިންނަށް މުސާރައާއެކު ޗުއްޓީދޭ ގައުމުތަކުގެ ތެރޭން ގައުމެއް.
ތިންވަނަ ޖިންސުގެ ހައްގުތައް ގާނޫނުގެ ތެރޭން ކަށަވަރުކޮށްދިނުނަށް ދަނީ މަސައްކަތް ކުރަމުން.
އިންޑިއާއިން ބޭނުން ވަނީ ދުނިޔޭގެ ތަޖުރިބާއިން ދަސްކުރަން. އިންޑިއާގެ ތަޖުރިބާ ހިއްސާ ކުރަން.
އދން 75 އަހަރު ފާހަގަ ކުރާއިރު އަޅުގަނޑުމެން އެންމެން ދުނިޔޭގެ ޚިދުމަތުގައި ދެމިތިބުމަށް އަޒުމު ކަނޑައަޅަމާތޯ!
ޝުކުރިއްޔާ
