މަޑަގަސްކަރައިގައި ރޭ ފެށުނު އިންޑިއަން އޯޝަން އައިލެންޑް ގޭމްސް (އައިއޯއައިޖީ) ފެށުމުގެ ރަސްމިއްޔާތަށް ދަނޑަށް ވަންނަން އުޅުނު މީހުންތަކެއް ފިތި ބާރުވެގެން ބާރަ މީހަކު މަރުވެ، އަށްޑިހަ އެތައް ބަޔަކަށް އަނިޔާވި ހާދިސާއާ ގުޅިގެން ދިވެހިރާއްޖެ ވަނީ މަޑަގަސްކައިގެ ރައްޔިތުންނާ އެކުގައި ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ރައީސް މިހެން ވިދާޅުވީ އެކްސް.ކޮމްގައި ކުރައްވާފައިވާ ޓުވީޓެއްގައެވެ. މިހާދިސާއާ ގުޅިގެން ރައީސް ކުރެއްވި މި ޓުވީޓެގައި ވިދާޅުވީ، އިންޑިއަން އޯޝަން އައިލެންޑް ގޭމްސް ފެށުމުގެ ރަސްމިއްޔާތުގެ ތެރެއިން މަޑަގަސްކަރަގައި ހިނގި ނުރައްކާތެރި ހާދިސާއާ ގުޅިގެން ހިތާމަކުރައްވާ ކަމަށެވެ.
ރައީސް ސާލިހު ވަނީ، މަޑަގަސްކަރަގެ ރައީސް އެންޑްރީ ރަޖޯލީނާއަށް އަދި މި ހިތާމަވެރި ހާދިސާގެ ސަބަބުން އަސަރުކުރި އެންމެނަށްވެސް ވަރަށް އިހްލާސްތެރިކަމާއެކު ތައުޒިޔާ ދަންނަވާފައެވެ. ރައީސް އިތުރަށް ވިދާޅުވީ، މި ދަތި ދަނޑިވަޅުގައި ރާއްޖެ އޮތީ މަޑަގަސްކަރާއާއެކު ކަމަށެވެ.
ރޭ ސްޓޭޑިއަމްގައި ހަރަކާތްތެރިވި ރެޑް ކްރޮސްގެ އޮފިޝަލުން ބުނީ، ވަރަށް ގިނަ އަދަދެއްގެ ބަޔަކު ސްޓޭޑިއަމްގެ ދޮރުމައްޗަށް ޖަމާވި ކަމަށެވެ. އެހެންކަމަށްވުމުން ފިތިހެން އަނިޔާވި ބައެއް މީހުން އެސަރަހައްދުގެ އަރިއަރި މަތީގައި ވެއްޓިފައިވެސް ތިބި ކަމަށެވެ. އަދި އަނެއް ބަޔަކު ވަރުބަލިވެ ނޭވާލާން ދަތިވެގެން އިށީނދެ ތިބިކަމަށް ވެސް ހަބަރުތަކުގައި ބުނެފައިވެއެވެ.
41،000 މީހުންގެ ޖާގައިގެ މި ސްޓޭޑިއަމަށް ވަންނަން ގިނަބަޔަކު އެއްފަރަހާ ދިމާ ކުރުމުން ހިނގި އެ ހާދިސާފައި ފިތި ބާރުވެގެން 12 މީހަކު މަރުވި އިރު 80 މީހަކަށް އެކިވަރުގެ އަނިޔާތަށް ލިބިގެން ފަރުވާ ދީފައި ވެސް ވެއެވެ.
މިހާދިސާ ހިނގާގައި ވަނީ، މުބާރާތުގައި ބައިވެރިވާ ދިވެހި ކޮންޓިންޖެންޓްގެ އިވެންޓްތައް މިއަދު އޮތުމާއެކު ރޭ ދަނޑުން ނުކުތް ފަހުންނެވެ. އެހެންކަމަށްވުމާއެކު، މި މުބާރާތުގައި ރާއްޖެއިން ބައިވެރިވާ އެއްވެސް އެތްލީޓަކަށް އަދި ދިވެއްސަކަށް އަނިޔާއެއް ލިބިފައި ނުވާކަމަށް މައުލޫމާތު ވަނީ ލިބިފައެވެ.
މީގެ ކުރިން 2016 ވަނަ އަހަރުވެސް މި ސްޓޭޑިއަމްގައި އޮތް މަޑަގަސްކަރަ ގައުމީ ދުވަހުގެ އިހުތިފާލުތަކަށް ވަންނަން އުޅުނު މީހުންނާ ކައިރި ސަރަހައްދެއްގައި އަތުބޮމެއް ގޮވައި ދެ މީހަކު މަރުވެ އަށްޑިހަ މީހަކު ޒަހަމްވެފައިވާއިރު، 2018 ގައި ވެސް މި ސްޓޭޑިއަމްގައި ކުޅުނު މަޑަގަސްކަރަ – ސެނެގާލް ގެ ފްޓުބޯޅަ މެޗެއް ބަލަން ވަންނަން އުޅުނު މީހުންގެ ތެރޭގައި މިފަދަ ހާދިސާއެއް ހިނގައި އެކަކު މަރުވެ ސާޅީސް މީހަކު ވަނީ ޒަހަމްވެފައެވެ. ހަމަމިފަދައިން، 2019 ވަނަ އަހަރު ހިނގި ހާދިސާގައި ފަނަރަ މީހަކު މަރުވިއެވެ. 2021 ވަނަ އަހަރުވެސް މިސްޓޭޑިއަމް ކައިރީ ވަނީ ބޮމުގެ ހަމަލައެއްގައި ކުޑަކުއްޖަކު މަރުވެ، ގިނަބަޔަކު ޒަހަމްވިއެވެ.
