ހުޅުމާލޭގައި ތެލަސީމިއާގެ އާ ސެންޓަރަކާއި ބްލަޑް ސާވިސްގެ އާ އިމާރާތެއް ހަދަން ނިންމާފައިވާ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.
ބޯންމެރޯ ޓްރާންސްޕްލާންޓް ހެދުމަށް އިތުރު ފަސް ފަރާތެއް ފޮނުވުމަން ނިންމައި އެކަމުގެ ލިޔުން ހަވާލުކުރުމަށް ހެލްތު މިނިސްޓްރީގައި މިއަދު ބޭއްވި ރަސްމިއްޔާތެއްގައި ވާހަކަދައްކަވަމުން ނަސީމް ވިދާޅުވީ ސަރުކާރުގެ އަމާޒަކީ ތެލެސީމިއާ ކުދިންނަށް ބޭނުންވާ ފަރުވާ އާއި ބޭސް ވީހާވެސް ފަސޭހަ ގޮތެއްގައި ފޯރުކޮށްދިނުން ކަމަށެވެ.
ނަސީމް ވިދާޅުވީ ހުޅުމާލޭގައި ހަދާ ތެލެސީމިއާ ސެންޓަރާ އެކު ތެލެސީމިއާ ކުދިންނަށް ދެމުންގެންދާ ހިދުމަތްތައް އިތުރަށް ފުޅާކުރެވި، ޖާގައިގެ ދަތިކަމަށް ހައްލެއް ލިބިގެންދާނެ ކަމަށެވެ. އަދި އެ ސެންޓަރުގައި ނެޝަނަލް ބްލަޑް ބޭންކްގެ ހިދުމަތް ގާއިމުކޮށް، އެ ހިދުމަތް ރާއްޖޭގެ ހުރިހާ ސިއްހީ ހިދުމަތްދޭ މަރުކަޒުތަކަށް ފޯރުކޮށްދެވި ގެންދާނެ ކަމަށް ނަސީމް ވިދާޅުވިއެވެ.
ނަސީމް ވިދާޅުވީ ބޯންމެރޯ ޓްރާންސްޕްލާންޓް ކުރުމުގެ ހިދުމަތަށް ހާއްސަ އިސްކަމެއް ސަރުކާރުން ދޭ ކަމަށެވެ.
ބޯންމެރޯ ޓްރާންސްޕްލާންޓް ފަރުވާގެ ކަންކަން ކާމިޔާބުކަމާ އެކު ކުރިއަށް ގެންދިއުމަށް އެކި ގައުމުތަކުން އެ ހިދުމަތް ދެމުންގެންދާ ގޮތް ހޯދައި ބަލައި ދިރާސާ ކޮށްފައިވާ ކަމަށް ނަސީމް ވަނީ ވިދާޅުވެފައެވެ. އަދި އެ މަސައްކަތުގެ އަލީގައި މިފަހަރު ބޯންމެރޯ ހަދަންދާ ކުދިންގެ ފަރުވާގެ ކަންކަން ކާމިޔާބުކަމާއެކު ނިންމައިލެވޭނެ ކަމަށް އުއްމީދުކުރައްވާ ކަމަށްވެސް ނަސީމް ވިދާޅުވިއެވެ.
