މި އަހަރުގެ ރިޔާސީ އިންތިހާބުގެ ދެވަނަ ބުރުގައި ވާދަ ކުރައްވަވާ އެއްވެސް ބޭފުޅަކާއިއެކުގައި ކޯލިޝަން ނުހެދުމަށް އަމިއްލަ ގޮތުން ރިޔާސީ އިންތިހާބުގައި ވާދަކުރެއްވި ހަސަން ޒަމީލް ނިންމަވައިފިއެވެ.
އެމަނިކުފާނު މިހެން ވިދާޅުވީ، ދެވަނަ ބުރުގައި ކޯލިޝަން ހައްދަވައިފާނެތޯ އޮންލައިން ނޫހަކުން ސުވާލު ކުރުމުން ދެއްވި ޖަވާބުގައެވެ.
މީގެއިތުރުން ޒަމީލްވަނީ ރިޔާސީ ކެމްޕެއިނުގައި ވެސް، ކޯލިޝަން ސަރުކާރެއްގެ ސަބަބުން، ރައްޔިތުންނަށް ފައިދާ ނުވާ ކަމަށް ވިދާޅުވެ، ކޯލިޝަން ހެދުމާއި ދެކޮޅަށް ވާހަކަ ދައްކަވައިފައެވެ.
މިދިޔަ ހޮނިހިރު ދުވަހު ކުރިއަށްދިޔަ ރިޔާސީ އިންތިހާބުގެ ފުރަތަމަ ބުރުގައި ޒަމީލު 327 ވޯޓު ހޯއްދެވިއެވެ.
އިންތިހާބުގައި ވާދަ ކުރައްވާކަން ހާމަކުރެއްވުމުގެ އެއްމަސް ދުވަސް ކުރިން، ޑިފެންސް މިނިސްޓްރީގެ ސްޓޭޓް މިނިސްޓަރުގެ މަޤާމުން އެމަނިކުފާނު އިސްތިއުފާ ދެއްވިއެވެ. ޒަމީލު ވަނީ އޭނާއަށް ވޯޓު ދެއްވި މީހުންނަށް ޝުކުރު އަދާކުރައްވައި، ނަތީޖާއިން އުއްމީދު އައުވެގެން ދިޔަ ކަމަށް ވެސް ވިދާޅުވެފައެވެ.
