ލޯކަލް ކައުންސިލްތަކުގެ އިދާރީ މުވައްޒަފުންގެ މުސާރައިގެ ކުރިއެރުން ދެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު މިއަދު ސާލިހު ނިންމަވައިފިއެވެ.
ރައީސް އޮފީހުގެ ތަރުޖަމާނު މިއުވާން މުހައްމަދު މިއަދު ވިދާޅުވީ މިނިސްޓްރީތަކުގެ ސިވިލް ސާވިސް މުވައްޒަފުންނެކޭ އެއްފަދައިން، ކައުންސިލްތަކުގެ ސިވިލް ސާވިސް މުވައްޒަފުންނަށް ވެސް 35 އިން ސައްތަ އެލަވަންސް ލިބޭ ގޮތަށް ރައީސް ނިންމަވާފައިވާ ކަމަށެވެ.
އެލަވަންސް ލިބެން ފަށާނީ އަންނަ މަހުގެ އެއްވަނަ ދުވަހުން ފެށިގެން ކަމަށް ވެސް މިއުވާން ވަނީ ވިދާޅުވެފައެވެ.
މިކަމާ ގުޅިގެން ރައީސް އޮފީހުން ނެރުނު ބަޔާނެއްގައި ހާމަކޮށްފައިވާ ގޮތުގައި، ރައީސް އެގޮތަށް ނިންމަވާފައި ވަނީ ކައުންސިލް މުވައްޒަފުންގެ މެދުގައި އުފެދިފައިވާ ހިތްހަމަނުޖެހުންތަކާއި އެ މުވައްޒަފުންގެ ފަރާތުން ލިބިފައިވާ ޝަކުވާތަކަށް ރިއާއަތް ކުރުމަށް ފަހުގައި ކަމަށެވެ.
އަދި، އެލަވަންސް ނުލިބުމަކީ ލާމަރުކަޒީ ގޮތުން ރައްޔިތުންނާ އެންމެ ގާތުން ހިދުމަތް ފޯރުކޮށްދިނުމަށް އެ މުވައްޒަފުން ކުރަމުން ގެންދާ މަސައްކަތްތަކަށް އެޅޭ ބޮޑު ހުރަހެއް ކަމަށާއި، ކައުންސިލްތަކުގެ މުވައްޒަފުންނަށް ވެސް މި އެލަވަންސް ދިނުމަކީ އެންމެ ރަގަޅު ގޮތް ކަމަށް ރައީސް ގަބޫލުކުރައްވާ ކަމަށް ވެސް ބަޔާނުގައި ބުނެފައިވެއެވެ.
ލޯކަލް ކައުންސިލްތަކުގެ އިދާރީ މުވައްޒަފުންނަށް 35 ޕަސަންޓު އެލަވަންސް ދޭން ނިންމެވިއިރު, ރައީސް ވަނީ ނަރުހުންނާއި މެޑިކަލް އޮފިސަރުންނަށް އެޓެންޑެންސް އެލަވަންސް ލިބޭ ގޮތަށް މުސާރައިގެ އޮނިގަނޑަށް ބަދަލުތަކެއް ގެންނަވާފަ އެވެ.
