އިޒްރޭލުން ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަނެ, ގަދަބާރުން ފޭރިގެންފައިވާ އެގައުމުގެ ބިންތައް އަނބުރާ ދޭން ޖެހޭ ކަމުގައި ދިވެހިރާއްޖޭގެ އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ޑރ. މުއިއްޒު މިހެން ވިދާޅުވީ އެކްސް.ކޮމްގައި މިރޭ ކުރެއްވި ޕޯސްޓެއްގައެވެ.
ޑރ. މުއިއްޒުގެ އެ ޕޯސްޓްގައި ވިދާޅުވެފައިވަނީ ފަލަސްތީނަކީ ވަކި މިނިވަން ދައުލަތެއްގެ ގޮތުގައި އިޒްރޭލުން ބަލައިގަންނަން ޖެހޭ ކަމަށާއި ގަދަބާރުން އަތުލާފައިވާ ފަލަސްތީނުގެ ބިންތައް އަނބުރާ އެބައިމީހުންނަށް ދޭންޖެހޭ ކަމަށެވެ. އަދިވެސް އިތުރަށް މުއިއްޒު ވިދާޅުވެފައިވަނީ އީސްޓް ޖެރޫސަލަމް(އިރުމަތީ އޫރުސަލީމް) އަކީ ފަލަސްތީނުގެ ވެރިރަށްކަމުގައި ގަބޫލުކޮށް 1967 ވަނަ އަހަރު އޮތް އިން ވަކިކުރާ ބޯޑަރުތަކަށް ރުޖޫއަވުމަށާއި ވީއެންމެ އަވަސްގޮތެއްގައި ރެފިއުޖީން އަނބުރާ ފަލަސްތީނަށް ދިއުމަށް މަގުފަހިކޮށްދެން ޖެހޭކަމަށެވެ.
އިންތިހާބީ ރައީސް މިހެން ވިދާޅުވެފައި މިވަނީ ހަމާސް ޖަމާއަތުން އިޒްރޭލަށް ކުއްލި ހަމަލާތަކެއް ދިނުމާ ގުޅިގެން ފަލަސްތީނާއި އިޒްރޭލާއި ދެމެދު ކުއްލި ހަނގުރާމައެއް ފެށިގެން ކުރިއަށްދާ ދަނޑިވަޅެއްގައެވެ.
ކުއްލި މި ހަނގުރާމައިގާ މިހާތަނަށް އިޒްރޭލުން 100އެއްހާ މީހުން ފަލަސްތީނުން 200 އެއްހާ މީހުން މަރުވެފައިވާކަމަށް މީޑިއާ ރިޕޯޓްތައް ބުނެއެވެ.
