އިޒްރޭލުގެ ހައްދު ފަހަނައަޅައި ގޮސްފައިވާ އަނިޔާވެރިކަމުގައި ނެތިފަނާވަމުންދާ ފަލަސްތީނުގެ ރައްޔިތުންނަށް އެހީވުމުގެ ގޮތުން އިންޓަނޭޝަނަލް އެއިޑް ކެމްޕެއިން، އައިއޭސީ އިން ހުޅުވާފައިވާ ފަންޑަށް ރާއްޖޭގެ އެކި ހިސާބުގައި މަސްވެރިކަން ކުރަމުން އަންނަ ނުވަ ދޯންޏަކުން ތިން ލައްކައަށްވުރެ ގިނަ ރުފިޔާ ހަދިޔާ ކޮށްފިއެވެ.
އެންމެ ގިނަ އަދަދެއްގެ ފައިސާ ޖަމާކުރީ ގއ ކޮލަމާފުށި "ރާސްތާ" ދޯނިންނެވެ. އެ ދޯނިން ވަނީ 127،433ރ. ހަދިޔާކޮށްފައެވެ.
ފަލަސްތީނުގެ ރައްޔިތުންނަށް އެހީތެރިކަން ފޯރުކޮށް ދިނުމުގެ ގޮތުން މިދިޔަ ހަފްތާގެ ތެރޭ ފަލަސްތީނު ފަންޑަށް އެހީ ފޯރުކޮށްދިން މަސްދޯނިތަކަކީ:
- ގއ ކޮލަމާފުށި "ރާސްތާ" -/127،433 (އެއްލައްކަ ހަތާވީސް ހާސް ހަތަރުސަތޭކަ ތިރީސް ތިން) ރުފިޔާ،
- ގއ ކަނޑުހުޅުދޫ "ސީހޯސް-3" -/50،000 (ފަންސާސް ހާސް) ރުފިޔާ
- ގއ ވިލިނގިލީ "ހުސްނީ" -/25،000 (ފަންސަވީސް ހާސް) ރުފިޔާ
- ގއ ވިލިނގިލީ "އުޖާލާ" -/25،000 (ފަންސަވީސްހާސް) ރުފިޔާ،
- ގއ މާމެންދޫ "ދުވެލި-6" -/25،000 (ފަންސަވީސް ހާސް) ރުފިޔާ،
- ގއ މާމެންދޫ "ހުށިޔާރު" -/25،000 (ފަންސަވީސް ހާސް) ރުފިޔާ،
- ގއ ފަރެސްމާތޮޑާ "ޑޭޒީ ވިއު" -/25،000 (ފަންސަވީސް ހާސް) ރުފިޔާ
- ލ މާވަށު "ރަންދޯދި" -/25،000 (ފަންސަވީސް ހާސް) ރުފިޔާ
- ގއ ވިލިނގިލީ "ކަރަވައްތާ" -/25،000 (ފަންސަވީސް ހާސް) ރުފިޔާ
މި މަސްވެރި ނުވަ އުޅަނދުން ފަލަސްތީން ފަންޑަށް ހަދިޔާކުރި ފައިސާގެ ޖުމްލައަކީ 352،433 (ތިންލައްކަ ފަންސާސްދެހާސް ހަތަރުސަތޭކަ ތިރީސްތިން) ރުފިޔާއެވެ.
ދިވެހިރާއްޖޭގެ މަސްވެރިން ވަނީ ފާއިތުވެދިޔަ ތަނުގައި ވެސް މިފަދަ ކޮންމެ ކަމެއްގައި ނަމޫނާ ދައްކާފައެވެ. ކޮވިޑްގެ ހާލަތުގައި ރާއްޖޭގެ އެކި ކަންކޮޅުތަކުގެ މަސްވެރި އުޅަނދުތަކުން ވަނީ ކޮވިޑްގައި ކަރަންޓީނަށް ލީ ރަށްރަށަށް ކެއުމަށް ބޭނުންވާ މަސް ހިލޭ ފޯރުކޮށްދީފައެވެ.
ފަލަސްތީނަށް އެހީވުމުގެ ގޮތުން ރާއްޖޭގެ އެކިކަންކޮޅު ތަކުގައި ތަފާތު ފަންޑްރައިޒް އިވެންޓްތައް އަންނަނީ މިހާރު ވެސް ހިންގަމުންނެވެ. ފަލަސްތީނުގައި އިޒްރޭލުން ހިންގާ ލާއިންސާނީ އަމަލުތައް ހުއްޓާލައި، އިޒްރޭލުން ހިފާފައިވާ ފަލަސްތީނުގެ ބިންތަކުން ފޭބުމަށް ގޮވާލައި އެއްވުންތައް ވެސް ރާއްޖޭގައި އަންނަނީ ބާއްވަމުންނެވެ.
އެހީގެ ގޮތުގައި މިހާރަނަސް އައިއޭސީން ހުޅުވާލި އެ ފަންޑަށް އެކި ފަރާތްތަކުން ވަނީ 12 މިލިއަނަށްވުރެ ގިނަ ރުފިޔާ ޖަމާކޮށްފައެވެ.
މިމަހުގެ ހަތްވަނަ ދުވަހުން ފެށިގެން އިޒްރޭލުން ދެމުންގެންދާ ހަމަލާތަކުގައި މިހާތަނަށް ގާޒާއިން 3،800 އަށްވުރެ ގިނަ މީހުން ވަނީ ޝަހީދުވެފައެވެ. ހަނގުރާމައިގެ މިހާތަނަށް އިޒްރޭލުގެ 1،400 މީހުން ވަނީ މަރުވެފައެވެ.
