އިންތިހާބީ ރައީސް ޑރ.މުހައްމަދު މުއިއްޒު ރައީސްކަމުގެ ހުވާކުރެއްވުމުގެ ރަސްމިއްޔާތުގައި އާންމުންގެ 1000 މީހުން ބައިވެރިކުރުމުގެ އިންތިޒާމުތައް ހަމަޖައްސަމުންދާ ކަމަށް އިންތިހާބީ ރައީސްގެ އޮފީހުން މިއަދު ވިދާޅުވެއްޖެއެވެ.
އިންތިހާބީ ރައީސް ހުވާކުރެއްވުމުގެ ރަސްމިއްޔާތަށް 3,500 އެއްހައި ބޭފުޅުންނަށް ދައުވަތު އަރުވާނެ ކަމަށް ރައްޔިތުންގެ މަޖިލީހުގެ އިދާރާއިން ވަނީ ބުނެފައެވެ. އެ ބޭފުޅުންގެ ތެރޭގައި ގައުމުތަކުގެ އިސް ވެރިންވެސް ހިމެނިވަޑައިގަންނަވައެވެ.
ނަމަވެސް އެކަން ފާހަގަ ކުރައްވާ އިންތިހާބީ ރައީސްގެ އޮފީހުހެ އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވީ އާންމުންގެ ތެރެއިން 1000 މީހުން މި ރަސްމިއްޔާތުގައި ބައިވެރިކުރުމަށް ނިންމާފައިވާ ކަމަށެވެ.
އިންތިހާބީ ރައީސް ހުވާކުރެއްވުމުގެ ރަސްމިއްޔާތު އޮންނާނީ ނޮބެމްބަރު މަހުގެ 17 ވަނަ ދުވަހު ޖުމްހޫރީ މައިދާނުގައެވެ. އަދި މި ރަސްމިއްޔާތަށް އެ ތަން ތައްޔާރުކުރުމުގެ މަސައްކަތް މިހާރު ވަނީ ފަށާފައެވެ.
