ރާއްޖެއިން ތައިލޭންޑަށް ކަނޑައަޅާ ސަފީރުގެ މަގާމަށް ހަމަޖެއްސުމަށް އިލެކްޝަންސް ކޮމިޝަނުގެ ކުރީގެ ރައީސް ފުއާދު ތައުފީގުގެ ނަން ރައްޔިތުންގެ މަޖިލީހުގެ ތަޅުމަށް ރައީސް ޑޮކްޓަރ މުހައްމަދު މުއިއްޒު ފޮނުއްވައިފިއެވެ.

ރައްޔިތުންގެ މަޖިލީހުގައި މިހާރު ހިނގަމުންދާ ޖަލްސާގައި ވަނީ، ސަފީރަކަށް ފުއާދުގެ ނަން ހުށަހަޅުއްވައި ރައީސް ހުށަހަޅުއްވާފައިވާ ސިޓީ އިއްވާފައެވެ.

ތަފާސް ހިސާބުގެ އިލްމު ދާއިރާއިން ތައުލީމު ހާސިލް ކުރައްވައިގެން ހުންނެވި ފުއާދު ތައުފީގް އިއްޔެއާ ހަމައަށް ހުންނެވީ އިލެކްޝަން ކޮމިޝަނުގެ މެމްބަރެއްގެ ގޮތުަގައެވެ.

ފުއާދުގެ ނަން ތައިލޭންޑުގެ ސަފީރުގެ މަގާމަށް ހަމަޖެއްސުމަށް ފޮނުއްވާފައިވާއިރު، ނެޝަނަލް އިންޓަރ ގްރިޓީ ކޮމިޝަނުގެ މެމްބަރުކަމަށް އައްޔަން ކުރުމަށް ގ.ނޫރަންފިނި އަލްއުސްތާޛާ މަރްޔަމް އިންޝާ ފައިސަލްގެ ނަން މަޖިލީހުގެ ތަޅުމަށް މިމަހުގެ 23 ވަނަ ދުވަހު ރައީސް ވަނީ ފޮނުއްވާފައެވެ.