ޕާކިސްތާންގެ އިދިކޮޅު ލީޑަރު ޝާހްބާޒް ޝަރީފް ހައްޔަރުކޮށްފިއެވެ. އަމިއްލަ ނޫސް ޗެނެލެއްގައި ވާހަކަ ދައްކަވަމުން ޕާކިސްތާންގެ އިންފޮމޭޝަން މިނިސްޓަރ ޝިބްލީ ފަރަޒް ވިދާޅުވީ، ޝަރީފް ހައްޔަރުކޮށްފައިވަނީ ކޯޓު އަމުރެއްގެ ދަށުން ކޮރަޕްޝަންގެ މައްސަލައެއްގައި ކަމަށެވެ.
އިދިކޮޅު ފަރާތްތަކުން ތުހުމަތު ކުރަނީ ކޮރަޕްޝަންއާ ދެކޮޅަށް މައްސަލަތައް ބަލާ އެކައުންޓެބިލިޓީ ބިއުރޯ މެދުވެރިކޮށް އިމްރާން ޚާން އިދިކޮޅު ފަރާތްތައް ބަންދުކުރަން މަސައްކަތް ކުރަނީ ކަމަށެވެ.
މަނީ ލޯންޑަރިމްގެ މައްސަލާގައި ޝާހްބާޒް ޝަރީފް ހައްޔަރުކުރުން ކުށްވެރިކުރައްވަމުން އިދިކޮޅު ޕާކިސްތާން ޕީޕަލްސް ޕާޓީގެ ރައީސް ބިލާވަލް ބުއްޓޫ ޒަރްދާރީ ސަރުކާރަށް ގޮވާލައްވާފައި ވަނީ ވަގުތުން ޝަރީފް މިނިވަން ކުރުމަށެވެ.
ބިލާވަލް ބުއްޓޫއަކީ، ޕާކިސްތާންގެ އިދިކޮޅު ފަރާތްތަކުން އެކުލަވާލާފައިވާ އިމްރާން ޚާންގެ ސަރުކާރާ ދެކޮޅުވެރި، ޑިމޮކްރެޓިކް މޫވްމެންޓްގެ ރައީސެވެ.
ޝާހްބާޒް ޝަރީފްއަކީ ޕާކިސްތާންގެ ޕާލަމެންޓްގައި އިދިކޮޅު ލީޑަރެވެ. ކުރީގެ ބޮޑު ވަޒީރު ނަވާޒް ޝަރީފްގެ ކޮއްކޮ ޝާހްބާޒްގެ ދިފާއުގައި ވާހަކަ ދައްކަވަމުން ޕާކިސްތާން މުސްލިމް ލީފް (ނ)ގެ މަރްޔަމް ނަވާޒް ވިދާޅުވީ ޝާހްބާޒް ހައްޔަރުކޮށްފައިވަނީ އޭނާ، އޭނާގެ ބޭބެ ނަވާޒް ޝަރީފާ ދެކޮޅަށް ސަރުކާރުން ބޭނުންވާ ގޮތަށް ބަޔާން ނުދިނުމުން ކަމަށެވެ.
ކިޔާލަން: އާސިމް ބާޖްވާއާއެކު އިމްރާން ޚާންވެސް އިސްތިއުފާ ދެއްވަންވީ: މަރްޔަމް ނަވާޒް
މަރްޔަމް ނަވާޒް ވިދާޅުވިގޮތުގައި ޕާކިސްތާންގައި ކަންކަން އިންސާފު ދާނަމަ އެންމެ ފުރަތަމަ އެންޓި ކޮރަޕްޝަނުން ހައްޔަރުކުރަން ޖެހޭނެ މީހަކީ މޭޖަރ ޖެނެރަލް (ރ) އާސިމް ބާޖްވާ ކަމަށެވެ.
ބިލިއަން ޑޮލަރުގެ ޕާކިސްތާން އިކޮނޮމިކް ކޮރިޑޯ (ސީޕެކް) ރައީސް އާސިމް ބާޖްވާ 99 ކުންފުނި ހަދައިގެން އުޅުނު މައްސަލައެއް މީޑިއާގައި ފެންތިވުމުން ސަރުކާރުން އެއަށް ފިޔަވަޅު އަޅާފައި ނުވުމުން އިދިކޮޅު ފަރާތްތަކުން ފާޑުކިޔާފައި ވެއެވެ.
އިދިކޮޅު ފަރާތްތަކުން ބޭއްވި ބައްދަލުވުމެއްގައި ވީޑިއޯގެ ޒަރީއާއިން ވާހަކަ ދައްކަވަމުން ނަވާޒް ޝަރީފް ސިފަ ކުރައްވާފައިވަނީ ތަހްރީކޭ އިންސާފް ޕާޓީގެ އިމްރާން ޚާނަކީ، ސިފައިން އިންދާފައިވާ ޕަޕެޓް ސަރުކާރެއް ކަމުގައެވެ.
