ދިވެހި ފުލުހުންގެ ހިދުމަތާއި ޔުނައިޓެޑް ސްޓޭޓްސް ޑްރަގް އެންފޯސްމަންޓް އެޑްމިނިސްޓްރޭޝަން ގުޅިގެން ކުރިއަށް ގެންދިޔަ އެޑްވާންސްޑް ނާކޮޓިކްސް އިންވެސްޓިގޭޝަން ކޯސް ނިންމުމުގެ ރަސްމިއްޔާތު ބާއްވައިފިއެވެ.
އިސްކަންދަރު ބިލްޑިންގގައި މިއަދު ބޭއްވި ރަސްމިއްޔާތު ޝަރަފުވެރިކޮށްދެއްވީ މޭޖަރ ކްރައިމް އިންވެސްޓިގޭޝަންސްގެ ހެޑް، ޗީފް ސުޕްރިންޓެންޑެންޓް އޮފް ޕޮލިސް ހަސަން ސައީދުއެވެ.
މި ރަސްމިއްޔާތުގައި، ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގެ ހެޑް، އެސިސްޓެންޓް ކޮމިޝަނަރ އޮފް ޕޮލިސް ޔޫނުސް ޞަބާޙް، ޑްރަގް އެންފޯސްމަންޓުގެ ހެޑް، ޗީފް ސުޕްރިންޓެންޑެންޓް އޮފް ޕޮލިސް އަޙްމަދު ޝާކިރު އަދި ޔުނައިޓެޑް ސްޓޭޓްސް ޑްރަގް އެންފޯސްމަންޓް އެޑްމިނިސްޓްރޭޝަންގެ ފަރާތުން މެދުއިރުމައްޗަށް ކަނޑައަޅާފައިވާ އިންޗާޖް މައިކަލް ރަޖެޕްޗިންސްކީ އާއި ކަންޓްރީ އަޓާށޭ، މާކް ފްރެޑްރިކް ބައިވެރިވެލެއްވިއެވެ.
ފުލުުހުން ބުނީ އެޑްވާންސްޑް ނާކޮޓިކްސް އިންވެސްޓިގޭޝަން ކޯހުގައި، މަސްތުވާތަކެއްޗާއި މަނީ ލޯންޑަރިންގ މައްސަލަތައް ތަހުގީގުކުރުމުގައި ބަލަންޖެހޭ ކަންތައްތަކުގެ މައުލޫމާތު ހިއްސާކޮށްފައިވެއެވެ. އަދި އެފަދަ އޮޕަރޭޝަންތަކުގައި، ދިމާވާ ހާލަތްތަކުގައި ފުރަތަމަ އެހީ ދޭނެގޮތުގެ މައުލޫމާތު ހިއްސާކޮށް ސެނާރިއޯ އެކްސަސައިޒް ތަކެއް ކުރިއަށް ގެންގޮސްފައިވާ ކަމަށެވެ.
އަދި މަސްތުވާތަކެއްޗާއި މަނީ ލޯންޑަރިންގ މައްސަލަތައް ތަހުގީގުކުރުމުގައި ދިމާވާ ހުރަސްތަކާ އަދި އެފަދަ ހުރަސްތަކާ ކުރިމަތިލާނެގޮތާއި މި ރީޖަންގައި އަމަލުކުރާގޮތްތައް ބުނެދީފައިވެއެވެ. އަދި މިފަދަ ކުށްކުރުމުގެ ވައްޓަފާޅިއަށް އަންނަ ބަދަލުތަކާއި އެކަންކަން ދެނެގަންނާނެގޮތައް ވެސް ކިޔައިދިނުމުގެ އިތުރުން އެހެން ގައުމުތަކުގައި މިފަދަ މައްސަލަތައް ހިންގާ ގޮތާއި ރާއްޖެ އެތެރެކުރުމަށް ކުރަމުންދާ މަސައްކަތްތަކުގެ މައުލޫމާތު ހިއްސާކޮށް އެބާވަތުގެ މައްސަލަތަކާ ކުރިމަތިލާނެ ގޮތްތައް ވެސް ކިޔައިދީފައިވާ ކަމަށް ފުލުހުން ބުންޏެވެ.
މި މަހު 3 އިން 7 އަށް ކުރިއަށް ގެންދިޔަ މި ކޯހުގައި 30 ފުލުހުން ބައިވެރިވެ ކޯސް ފުރިހަމަކޮށްފައިވެއެވެ.
