އަދާލަތު ޕާޓީގެ ރިޔާސީ އިންތިޚާބުގައި ލިބުނު ކާމިޔާބީއާއިއެކު އެންމެބޮޑު އިސްކަމެއް ދެއްވާނީ ޒުވާން ލީޑާޝިޕަކަށް ފުރުޞަތު ފަހިކުރުމަށް ކަމުގައި އަދާލަތު ޕާޓީގެ ރައީސް އިމްރާން ޢަބްދުﷲ ވިދާޅުވެއްޖެއެވެ.
އިމްރާން އެ މަޤާމަށް އިންތިޚާބު ވެފައިވަނީ އޭނާއާއި ވާދަ ކުރެއްވި އިސްލާމިކް މިނިސްޓަރ ޑރ. އަހްމަދު ޒާހިރުގެ މައްޗަށް ކުރި ހޯއްދަވައިގެންނެވެ. އޮންލައިންކޮށް ކުރިއަށްދިޔަ މި އިންތިޚާބުގައި 921 ވޯޓު އިމްރާނަށް ލިބިވަޑައިގެންނެވި އިރު، އަހުމަދު ޒާހިރުއަށް ލިބިވަޑައިގެންފައިވަނީ 167 ވޯޓެވެ. މި އިންތިހާބުގައި 1088 މީހުން ވޯޓު ލާފައި ވެއެވެ.
އިންތިހާބު ކާމިޔާބު ކުރެއްވުމަށްފަހު ޕީއެސްއެމް އަށް ދެއްވި އިންޓަވިއުއެއްގައި އިމްރާން ވިދާޅުވީ އަދާލަތުން އިއްޔެ ބޭއްވި އިންތިހާބަކީ ތާރީހީ އިންތިހާބެއް ކަމަށާއި އެގޮތުން މިއީ ރާއްޖޭގެ ސިޔާސީ ޕާޓީއަކުން ފުރަތަމަ ފަހަރަށް އީ ވޯޓިން ތައާރަފްކޮށް، އީ ވޯޓިންގެ ނިޒާމަކުން އިންތިހާބުގެ ކަންކަން ކުރިއަށްގެންދިޔަ ފުރަތަމަ ފަހަރު ކަމަށްވާއިރު މިއީ ލިބުނު ޝަރަފެއް ކަމަށެވެ.
"މިއީ ރާއްޖޭގައި ސިޔާސީ ޕާޓީތަކުގެ އިންތިހާބުތަކަށް ވަރަށް މުހިއްމު ފިޔަވަޅެއް އަޅުގަނޑުމެން މިއެޅީ. އާ ތަޖުރިބާއެއް މި ހޯދީ. ކުރިއަށް އޮތް ދުވަސްތަކުގައި އަދާލަތު ޕާޓީ ވެސް އަދި އެހެން ސިޔާސީ ޕާޓީތަކުން ވެސް ޔަގީން ކުރަން މި ތަޖުރިބާގެ އަލީގައި މެމްބަރުންނާއެކު ކުރިއަށް ދިޔުމަށް ވިސްނާނެ ކަމަށް" އިމްރާން ވިދާޅުވިއެވެ.
މީގެއިތުރުން އިމްރާން ވަނީ ކުރިއަށް އޮތް ދައުރުގައި އެންމެ ބޮޑު އިސްކަމެއް ދެއްވާނީ ޒުވާން ލީޑަރޝިޕަކަށް ފުރުޞަތު ފަހިކުރުމަށް ކަމަށް ވިދާޅުވެފައެވެ. އެގޮތުން އަދާލަތަކީ ޒުވާނުންނަށް އަބަދުވެސް މަރުހަބާ ކިޔާނެ ޕާޓީއެއް ކަމަށާއި ގާބިލު ޒުވާނުންނަށް ލީޑަޝިޕުން ޖާގަ ލިބޭނެ އިތުރު ފުރުސަތުތައް މިފަހަރު ހުޅުވާލާނެ ކަމަށްވެސް އިމްރާން ވިދާޅުވިއެވެ.
