އެންމެހައި ދިވެހި ރައްޔިތުންނާއި ހުރިހައި ސިޔާސީ ޕާޓީތަކުގެ މެންބަރުންނަށް އެއްވެސް ތަފާތު ކުރުމެއް ނެތި ލޯތްބާއި އިހްތިރާމާ އެކު މަސްއޫލިއްޔަތު އަދާކުރުން މަތީ ދެމިހުންނަވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ ޝަހީމް މިހެން ވިދާޅުވީ އިއްޔެ ވަޒީރުންނަށް ރުހުން ދިނުމަށް ބޭއްވި މަޖިލިސް ޖަލްސާގައި އެމަނިކުފާނަށް ރުހުން ނުދިނުމުން، ދެންވެސް ރައީސް ޑރ މުހައްމަދު މުއިއްޒު، އެމަނިކުފާނަށް އަލުން އަނބުރާ ކުރިއެކޭވެސް އެއްފަދައިން އިސްލާމިކް މިނިސްޓަރކަމުގެ މަގާމަށް އައްޔަނުކުރެއްވުމާ ގުޅިގެން ކުރެއްވި އެކްސްޕޯސްޓެއްގައެވެ.
އެ ޕޯސްޓުގައި ޑރ ޝަހީމް ވަނީ ރައީސް ޑރ މުއިއްޒު އެމަނިކުފާނާ ހަވާލު ކުރެއްވި އަމާނާތް އެންމެ ފުރިހަމަ ގޮތުގައި އަދާ ކުރައްވާނެކަމުގެ ޔަގީންކަންވެސް ދެއްވާފައެވެ.
ރައްޔިތުންގެ މަޖިލީހުގެ އިއްޔެގެ ޖަލްސާގައި ރުހުން ނުދިން ވަޒީރުންނަކީ:
- އިސްލާމިކް މިނިސްޓަރ ޑރ. ޝަހީމް
- އެޓާނީ ޖެނަރަލް އަހުމަދު އުޝާމް
- ހައުސިން މިނިސްޓަރ ޑރ. އަލީ ހައިދަރު
ޑރ. ޝަހީމަށް ރުހުން ދޭން ފެންނަ ކަމަށް 30 މެމްބަރުން ވޯޓްދެއްވި އިރު ރުހުން ދޭން ނުފެންނަ ކަމަށް 31 މެމްބަރަކު ވޯޓްދެއްވުމުގެ ސަބަބުން އެމަނިކުފާނަށް ރުހުން ނުދޭން މަޖިލިސް ނިންމެވިއެވެ. ނަމަވެސް އަނެއްކާވެސް ރައީސުލްޖުމްހޫރިއްޔާ ވަނީ ޑރ މުހައްމަދު ޝަހީމް އަލީސައީދަށް އިސްލާމީކަންކަމާބެހޭ ވުޒާރާގެ ވަޒީރުކަން ދެއްވަވާފައެވެ.
