ރޯޑް ސޭފްޓީ އެވެއާނަސް އެންޑް ޕްރިވެންޝަނުން ސްކޫލު ދަރިވަރުންނަށް ކުރިއަށް ގެންދާ ޓްރެފިކް މޮނިޓާސް ތަމްރީނު ޕްރޮގްރާމު ހުޅުމާލޭ، ގާޒީ ސްކޫލު އަދި ރެހެންދި ސްކޫލުގައި ފަށައިފިއެވެ.
އިއްޔެއިން ފެށިގެން ހަ ދުވަހުގެ މުއްދަތަށް އެ ދެ ސްކޫލުގައި ވަކިވަކިން ކުރިއަށް ގެންދާ އެ ޕްރޮގްރާމަކީ ސްކޫލު ކައިރީގައި ޓްރެފިކް ބެލެހެއްޓުމުގައި ދަރިވަރުން ބައިވެރިކޮށް އަދި އެކަމަށް ދަރިވަރުން ތަމްރީނުކުރުމަށް ކުރިއަށް ގެންދާ ޕްރޮގްރާމެކެވެ.
ފުލުހުން ބުނީ މި ޕްރޮގްރާމްގައި، ޓްރެފިކް ބެލެހެއްޓުމުގައި އަމަލުކުރަންޖެހޭ ގޮތުގެ ތަމްރީނު ދަރިވަރުންނަށް ދޭނެއެވެ. އަދި ޓްރެފިކް ބެލެހެއްޓުމުގައި ދަރިވަރުންގެ ސަލާމަތާއި ރައްކާތެރިކަމަށް މަސައްކަތްކުރާނެގޮތް ދަސްކޮށްދިނުމަށް ސެލްފް ޑިފެންސް ކުލާސްތައް ކުރިއަށް ގެންދާނެ ކަމަށެވެ.
މީގެ އިތުރުން، އެއްގަމު ދަތުރުފަތުރުގެ ގާނޫނާއި ގަވާއިދުތަކުގެ މައުލޫމާތުދިނުމާ އަދި ޓްރެފިކް މޮނީޓަރުންގެ ގޮތުގައި ދަރިވަރުން ހަރަކާތްތެރިވާއިރު ރިވެތި ބަހުން މުއާމަލާތުކުރުމުގެ ހުނަރުތައް ދަސްކޮށްދޭނެ ކަމަށްވެސް ފުލުހުން ބުންޏެވެ.
މި ޕްރޮގްރާމުގައި ގާޒީ ސްކޫލުގެ 17 ދަރިވަރުންނާއި ރެހެންދި ސްކޫލުގެ 43 ދަރިވަރުން ބައިވެރިވެއެވެ.
