މާލެ ސަރަހައްދުގައި ދިރިއުޅޭ އުމުރުން 55 އަހަރުން މަތީގެ ފަރާތްތަކަށް ކޯވިޑް-19 ގެ ވެކްސިން ދިނުން މިއަދު ފެށުމަށް ހަމަޖެހިއްޖެއެވެ.
އެޗްޕީއޭއިން ބުނި ގޮތުގައި ތިން ތަނަކުން މިއަދު 55 އަހަރުން މަތީގެ މީހުންނަށް ވެކްސިން ދިނުން ކުރިއަށްގެންދާނެއެވެ. އެގޮތުން ސޯޝަލް ސެންޓަރާއި ހުޅުމާލޭ ވެކްސިނޭޝަން ސެންޓަރުން މިއަދު ހެނދުނު 9 އިން ފެށިގެން ހަވީރު 5 އާ ހަމަޔަށް ވެކްސިން ދިނުން ކުރިއަށްގެންދާނެއެވެ. އަދި ވިލިމާލެ ޔޫތް ސެންޓަރުން ހެނދުނު 9 އިން މެންދުރު 1 އާއި ހަމައަށް ވެކްސިން ދިނުން ކުރިއަށްގެންދާނެއެވެ.
ވެެކްސިން ޖަހަންދާއިރު ބަލަންޖެހޭ ކަންތައްތައް:
– އައި.ޑީ ކާޑު ނުވަތަ ކާކުކަން އަންގައިދޭ ރަސްމީ ލިޔުމެއް ގެންދިއުމަށް
– ބަލީގެ އެއްވެސް އަލާމާތެއް ނެތުން އަދި ކަރަންޓީންގައި ހުރި މީހަކަށް ނުވުން
– ގަޔަށް ދޫ، ފަސޭހައިން ވެކްސިންޖަހާތަން (ކޮނޑު) ދެއްކޭނެ ހެދުމެއްލުން
– ވެކްސިންޖަހަން ދާއިރު ރަނގަޅަށް ކައިގެން ހުރުން
– ވެކްސިން ޖަހަންދާއިރު އަމިއްލަ ފެންފުޅިއެއް ގެންދިއުން
– ވެކްސިން ޖަހަންދާއިރު އެކުގައި އެކަކަށްވުރެ ގިނައިން ނުދިއުން
ރާއްޖޭގައި ކުރިއަށްދާ ވެކްސިން ޖެހުމުގެ ޕްރޮގްރާމްގެ ތެރެއިން އިއްޔެގެ ނިޔަލަށް ވަނީ 4000 އަށް ވުރެ ގިނަ މީހުންނަށް ވެކްސިން ދީފައެވެ.
