އެޓްލެޓިކޯ މެޑްރިޑްގެ ސަޕޯޓަރުންތަކެއްގެ ފަރާތުން އެތުލެޓިކް ކްލަބުގެ ކުޅުންތެރިޔަކަށް ރައްދުވި ނަސްލީ މަލާމާތުގެ މައްސަލައެއްގައި އެ ކްލަބު ޖޫރިމަނާ ކޮށްފިއެވެ.
އެތުލެޓިކް ކްލަބާ ދެކޮޅަށް އެޓްލެޓިކޯ މެޑްރިޑުން މިދިޔަ އާދިއްތަ ދުވަހު ކުޅުނު މެޗުގައި, އެތުލެޓިކް ކްލަބުގެ ފޯވާޑު ނީކޯ ވިލިއަމްސްއަށް ވަނީ އެޓްލެޓިކޯގެ ސަޕޯޓަރުންގެ ފަރާތުން ނަސްލީ މަލާމާތުގެ ބަސްތަކެއް ރައްދުވެފައެވެ. ސަޕޯޓަރުންގެ ފަރާތުން އެ ބަސްތައް ރައްދުވުމުގެ ސަބަބުން މެޗުގައި ރެފްރީ އަކަށް ހުރި ހުއާން މާޓިނޭޒް ވަނީ ފުރަތަމަ ހާފުގެ 36 ވަނަ މިނެޓުގައި މެޗުގެ ކުޅުން އިރުކޮޅަކަށް މެދު ކަނޑާލާފައެވެ.
ކަޅު ނަސްލުގެ ކުޅުންތެރިޔެއް ކަމަށްވާ ވިލިއަމްސްއަށް އެޓްލެޓިކޯގެ ސަޕޯޓަރުންގެ ފަރާތުން ކުރިމަތިވި ނަސްލީ ފުރައްސާރައިގެ ސަބަބުން އެ ކްލަބު ވަނީ ވިހިހާސް ޔޫކޭ ޕައުންޑުން ޖޫރިމަނާ ކޮށްފައެވެ. އޭގެ އިތުރުން ސްޕެއިންގެ ފުޓުބޯޅަ ފެޑެރޭޝަނުން ވަނީ, އެޓްލެޓިކޯ ދެން އެންމެ ފުރަތަމަ ކުޅޭ ދެ މެޗުގައި ސަޕޯޓަރުން ތިބޭ ސްޓޭންޑުން ބައެއް ބަންދު ކޮށްފައި ބެހެއްޓުމަށް އަންގާފައެވެ.
ނަސްލީ ތަފާތު ކުރުމުގެ މައްސަލައަކީ ލަލީގާގައި ވަރަށް އާއްމު މައްސަލައަކަށް ވަނީ ވެފައެވެ. މި ދިޔަ ދެ ސީޒަނުގައި އެކަނި ވެސް ރެއާލް މެޑްރިޑުގެ ވިނީޝިއަސް ޖޫނިއާއަށް ވަނީ 16 ފަހަރު ނަސްލީ މަލާމާތާ ކުރިމަތި ލާން ޖެހިފައެވެ. ލަލީގާއަށް ކުރިމަތިވެފައިވާ ނަސްލީ ތަފާތު ކުރުމުގެ ހާދިސާތަކަށް ސްޕެއިންގެ ފުޓުބޯޅަ ފެޑެރޭޝަނުން ހަރުކަށި ފިޔަވަޅުތަކެއް އަޅަމުން އަންނަ ކަމުގައިވިއަސް, މި މައްސަލައަށް ވަނީ ދާއިމީ ހައްލެއް ލިބޭ ގޮތް ނުވެފައެވެ.
